“Ta bëjmë golin e parë për 20 minuta”, Rei Manaj është i qartë për ndeshjen me San Marinon

Rei Manaj kërkon gol të shpejtë ndaj San Marinos

Sulmuesi dhe trajneri Maran u shfaqën së bashku në konferencën për shtyp në prag të ndeshjes me San Marinon. Fjalën e mori i pari Manaj. Ai u ndal edhe te përballja e fundit me Finlandën.

Për duelin e radhës, ai u shpreh optimist por kërkoi përqendrim maksimal në fushë. “Shiko, ndeshja me San Marinon është e mirë, janë më të dobët se ne, por kjo duhet treguar në fushë. Do të futemi në fushë që të mbyllim direkt ndeshjen dhe të marrim tre pikët”, tha Manaj.

Sipas sulmuesit, goli mbetet objektivi kryesor, pa rëndësi se si vjen. “Për ne e rëndësishme është që të shënojmë, nuk ka rëndësi mënyra. Trajneri ka pak kohë, por ka ide të qarta, lojtarët e ndjekin dhe janë profesionistë. Shpresoj që të jemi në 100% kur të fillojnë kualifikueset e Europianit”, shtoi ai.

Manaj insistoi për një nisje agresive për të zhbllokuar sfidën sa më parë. “Duhet të sulmojmë më shumë në 20 minutat e para që të hapim ndeshjen. Jam i lumtur që të luaj me çdo lloj lojtari. Nuk ka rëndësi kush shënon për mua”, përfundoi sulmuesi.