Sylvinho dhe e kaluara blaugrana, ish trajneri i Kombëtares Shqiptare tregon të pathënat e karrierës te Barcelona

Ish-trajneri i përfaqësueses shqiptare, Sylvinho, po kalon një periudhë reflektimi pas përfundimit të detyrës në muajin maj. Braziliani shprehet i gatshëm për një rikthim të mundshëm në stol, por pa ngut.

Çdo verë, ai viziton Barcelonën, vend ku ka ruajtur miqësi të forta nga koha si lojtar. Një prej tyre është drejtori sportiv aktual i klubit, Deco. Ky i fundit, shprehet Sylvinho, i ndryshoi jetën me një këshillë të thjeshtë në të shkuarën: "Sylvio ke bërë xhiron e botës, nëpër Evropë…Pse nuk vjen të jetosh në Porto?". "Dhe unë e bashkëshortja ime u mahnitëm. Është një qytet që të relakson", tregon trajneri në një rrëfim të gjatë për të përditshmen spanjolle Sport, ku u ndal edhe te tema e një rikthimi të mundshëm në Camp Nou.

"Me Decon njihemi që kur ishim shumë të rinj, që nga 1993. Si futbollistë kemi pasur një karrierë të mirë, ai më të mirë se unë. Por, jemi shumë miq dhe nuk i ngatërrojmë gjërat; ai ka jetën e tij, unë timen. Darkojmë bashkë, flasim. Në të vërtetë flasim pak për futbollin. Shumë herë na ka ardhur në majë të hundës teksa dëgjojmë të flitet për futboll gjithë ditën. Unë vij pas eksperiencës si trajner i Kombëtares Shqiptare prej 3 vitesh e gjysmë.Tani duhet të pushoj e relaksohem në pritje të hapave të tjerë", u shpreh Sylvinho për raportin me bashkëkombësin e tij në drejtim.

I pyetur se çfarë e bën Deco një drejtor sportiv të suksesshëm, Sylvinho theksoi: "Ka shumë personalitet, shumë karakter dhe përveç këtyre, ka një jetë në botën e futbollit. Jo të gjithë ne që vijmë nga bota e futbollit dhe që kemi luajtur në një nivel të lartë jemi automatikisht të përgatitur për të qenë trajnerë, drejtorë sportive apo drejtues. Ka një fazë, një etapë që duhet ta përmbushësh. E mbi të gjitha, një trajner apo drejtor sportiv nuk mund të bëjë gjithçka i vetëm. Ka një hierarki; presidentë, drejtues, drejtorë Sportivë dhe trajner. Të gjithë duhet të punojnë në një linje dhe së bashku. Kjo është e rëndësishme dhe ajo që po ndodh tani te Barcelona".

Mes lajmeve të fundit të klubit katalanas është edhe transferimi i Gabriel Jesusit, lojtar që Sylvinho e njeh mirë. "Një mik më dërgoi një mesazh këto ditë dhe më tha: 'Sylvio, ti dhe Gabriel Jesus jeni të vetmit brazilianë që keni luajtur te Arsenali, Manchester City dhe Barcelona'. Është një futbollist që e njoh nga 2016 apo 2017, kur ishte ne kualifikueset e Botërorit 2018. Në atë kohë unë isha në stafin teknik të Brazilit me Tite. Ishte shumë i ri, një futbollist shpërthyes, me shumë forcë fizike, teknik brenda zonës dhe me driblime. Është një futbollist që ka qenë pjesë e skuadrave të rëndësishme dhe tani vjen te një tjetër skuadër e tillë si Barcelona", vlerësoi ai.

Sylvinho komentoi edhe adaptimin e skuadrës së Hansi Flikut ndaj lojtarëve multifunksionalë. "Ajo që po shoh në futbollin modern është që skuadrat dhe trajnerët po blejnë futbollistë të një niveli të lartë, por që mund të kryejnë 2 apo 3 funksione në fushë. Një sulmues mund të luajë në krahë dhe të përfundojë si qendër sulmues; një nr.9 mund të përfundojë si sulmues krahu apo sulmues i dytë. Kjo po ndodh gjithnjë e më shpesh. Por jo vetëm në lojën me top. Edhe në lojën pa top, te presingu dhe gjithçka që mund të të bëjë skuadër. Është një futbollist i nivelit të lartë dhe do të merren frytet prej tij gjatë sezonit", tha ai për Jesusin.

Formacioni aktual i Barcelonës ka surprizuar shumë me performancën e Raphinhas. "Jo, nuk më habit. Dhe besoj se gjithçka ka Raphinha është më shumë se futboll. Është një futbollist me shumë personalitet. Po bën shumë mirë, edhe në pjesën mbrojtëse. Shumë herë e harrojmë këtë personalitet; është një futbollist që brenda fushës së lojës ndihet komod me fanellën e Barcelonës me 80 apo 90 mijë persona, në një derbi apo në ndeshjen kundër Realit të Madridit. Luan një ndeshje të madhe, sikur të mos ishte asgjë dhe kjo ka shumë rëndësi për një futbollist", shprehet braziliani.

Në pyetjen se a ka vënë re ndonjë talent para se ai të shpërthente në skenë, Sylvinho kujtoi: "Është një histori e gjatë, por do t'jua përmbledh. Në momentin e tij ai po luante në Francë dhe unë, që punoja me kombëtaren, po vëzhgoja futbollistët. Dhe në fund ka lojtarë brazilianë në të gjithë Evropën. Në një moment mora në telefon stafin teknik dhe iu thashë: shikoni kemi këtë lojtarë që ka bërë një hap të rëndësishëm, trajneri kontaktoi me të dhe në fund, pas pak kohësh u grumbullua në kombëtare. Dhe në 2-3 herët e para menduam; hej ky është një super lojtar".

Fjala e kaloi te prodhimi i ri i La Masias, Lamine Yamali, i cili shpesh krahasohet me Lionel Messin. "Dëshiron të dëgjish përgjigjen time? Je i sigurt? Yamal është Yamal. Nuk ështe as Neymar dhe as Messi. Përveç kësaj, Messi është një kapitull më vete, harrojeni. Kur e shikon lojtarin, sigurisht që mund të të kujtohen të tjerët; një driblim apo gjëra të tilla…por më pas si trajnerë gjykojmë futbollistët për shumë gjëra. Yamal është Yamal, një superlojtar që po fiton shumë duke qenë shumë i ri në moshë dhe për më tepër ka shumë kohë përpara. Do të shohim se çfarë do të ndodhë në 10 vitet e ardhshme", u përgjigj Sylvinho.

I pyetur për bashkëpunimin e hershëm me Lionel Messin te Barcelona, ish-mbrojtësi u ndal te kujtimet nga stërvitjet: "Nuk kujtoj një ditë specifike. Ne luajtëm së bashku te Barcelona për 5 vjet. Kur them ne, flas për Ronaldinho, Deco, unë…Ishim lojtarë të një brezi tjetër dhe ai ishte shumë i ri. Leo ishte shumë i heshtur, i ndrojtur. Kam shkuar shumë mirë me të. Kushedi, sepse ai ishte më i vogli dhe unë më i madhi, më i vjetri. Shkonim shumë mirë me njëri-tjeterin dhe shiheshim shpesh. Kisha mësuar pak spanjisht me Nelson Vivas te Arsenali. Për këtë arsye shpesh më kanë thënë se kam një spanjishte me pak theks argjentinas. Dhe me Leon kemi qeshur shumë. Por, po, më kujtohen duelet. Sigurisht e vuaja shumë, por kisha diçka në favor; eksperiencën dhe fatin që në stërvitje ndodheshim shpesh përballë", përfundoi Sylvinho.