Sulmet e 7 Tetorit/ Balla në ceremoninë e Ambasadës së Izraelit: Kujtesa është detyrim, të mos i harrojmë viktimat! Humanizmi më i fortë se urrejtja

Kreu i Grupit Parlamentar të Partisë Socialiste, Taulant Balla, mori pjesë në ceremoninë përkujtimore të organizuar në Tiranë nga Ambasada e Izraelit. Aktiviteti u mbajt me rastin e përvjetorit të sulmit terrorist të 7 tetorit 2023 në Izrael.

Gjatë fjalës së tij, Balla theksoi se nderimi për viktimat dhe qëndrimi pranë familjeve të tyre mbetet detyrë. Ai nënvizoi se data e 7 tetorit nuk duhet harruar kurrë.

“Sot, më 7 tetor, kujtuam viktimat e sulmit terrorist të 7 tetorit 2023 në Izrael. Kujtesa mbetet një detyrim ndaj viktimave dhe familjeve të tyre. Të kujtosh do të thotë të mos harrosh”, deklaroi Balla.

Në mesazhin e tij ai dënoi ashpër terrorizmin, antisemitizmin dhe çdo formë tjetër të nxitjes së urrejtjes. Balla kujtoi gjithashtu kontributin historik të shqiptarëve, të cilët mbrojtën hebrenjtë gjatë Holokaustit.

Ai u ndal te tradita e bashkëjetesës fetare në Shqipëri. Këtë traditë e lidhi me Besën. Sipas tij, pikërisht ky kod moral i shtyu shqiptarët të hapnin dyert për familjet hebreje të përndjekura.

“Ne nuk i shohim besimet e ndryshme si mure që na ndajnë. I shohim si rrugë të ndryshme që mund të bashkëjetojnë nën të njëjtën çati, brenda së njëjtës familje dhe si pjesë të të njëjtit komb”, tha ai.

Balla shtoi se përkujtimi i 7 tetorit duhet të kthehet në përgjegjësi për të ardhmen. Qëllimi, sipas tij, është refuzimi i urrejtjes dhe mbrojtja e dinjitetit njerëzor.

“Le të mos bëhemi kurrë indiferentë ndaj urrejtjes. Dhe kujtimi i 7 Tetorit le të forcojë vendosmërinë tonë për të ndërtuar një të ardhme ku paqja të jetë më e fortë se frika dhe humanizmi më i fortë se urrejtja”, u shpreh Balla.