Sulm me thikë në një shkollë në Stamboll, vdes një nxënës dhe lëndohen tetë tjerë

Një nxënës ka humbur jetën pasi u plagos rëndë në sulmin me thikë brenda një shkolle në Stamboll. Lajmi u konfirmua nga ministri turk i Arsimit, Yusuf Tekin.

Ngjarja ndodhi më 6 tetor në shkollën e mesme Sheikh Shamil Imam Hatip në Kayaşehir, në distriktin Başakşehir. Tetë nxënës mbetën të plagosur. Në njoftimet e para autoritetet bënë të ditur se njëri prej tyre ishte në gjendje kritike dhe dy të tjerë në gjendje të rëndë.

Sipas autoriteteve, sulmi u krye nga një vajzë e lindur në vitin 2011. Ajo është nxënëse e një shkolle të mesme në Küçükçekmece. Dyshohet se hyri në oborrin e shkollës në Kayabaşı dhe goditi me thikë nxënësit në mënyrë të rastësishme.

Guvernatori i Stambollit, Davut Gül, deklaroi se e dyshuara banonte në të njëjtën lagje. Ajo ishte futur në shkollë e veshur me uniformë. U ndalua nga punonjësit e sigurisë dhe iu dorëzua policisë.

Të lënduarit u transportuan menjëherë në spital. Pesë prej tyre kishin plagë të lehta dhe pritet të mbyllin trajtimin brenda ditës. Dy të tjerë vijojnë mjekimin. Gjendja e tyre po përmirësohet.