SPAK kontrolle në vilën e biznesmenit izraelit Ron Yeffet! Hetuesit zbarkojnë edhe në Ministrinë e Mbrojtjes

Prokuroria e Posaçme ka urdhëruar një seri kontrollesh. Shkak janë bërë regjistrimet e publikuara nga Arben Ahmetaj, i cili ndodhet në arrati.

Sipas burimeve, agjentët e Byrosë Kombëtare të Hetimit kanë ndërhyrë në vilën e biznesmenit me tri shtetësi, shqiptare, amerikane dhe izraelite, Ron Yeffet. Aksioni vijon ende në terren. Përgjimet pretendojnë një skemë të dyshuar trafiku armësh përmes kompanisë shtetërore KAYO.

SPAK ka nisur hetimin kryesisht pas këtyre audioregjistrimeve. Gjykata e Posaçme GJKKO ka miratuar kërkesën e prokurorëve për kontroll personal ndaj Yeffet. Verifikime janë kryer edhe në ambiente të tjera.

Burime pranë hetimit bëjnë me dije se në Ministrinë e Mbrojtjes janë sekuestruar dokumente. Materialet lidhen me dosjet dhe procedurat e tenderëve. Kompania TIMAK është përfshirë gjithashtu në hetimin intensiv të SPAK-ut.

Sipas Ahmetajt, në qendër të bisedave qëndron biznesmeni Ron Yeffet. Përkrah tij përmenden dy persona të tjerë, të identifikuar vetëm me emrat Igor dhe Sergei. Ish-zëvendëskryeministri pretendon se diskutimet lidhen me një qarkullim të paligjshëm armësh dhe municionesh përmes territorit shqiptar. Në to përmenden emrat e KAYO dhe TIMAK.

Komunikimet e bëra publike prekin disa çështje të ndryshme. E para ka të bëjë me ngritjen e një shoqërie të përbashkët për një projekt energjetik në Delvinë. Shteti do të zotëronte 20 për qind të aksioneve. Skemë e ngjashme përmendet për gazin në Vlorë. Aty palët ukrainase do të duhej të hapnin një kompani mbulesë në Shtetet e Bashkuara.

Një pjesë tjetër e dialogëve lë të kuptohet për trafik të mundshëm të armëve dhe municioneve të prodhuara në Afrikë. Sipas një fraze të dëgjuar në regjistrim, paketimi do të realizohej në Shqipëri.

Gjatë bisedave referencat për KAYO-n dhe Timak-un rikthehen shpesh. Timak është në pronësi të Yeffet me 49 për qind, ndërsa 51 për qind i takon Arjeta Pucës. Kompania ka hyrë në partneritet me ndërmarrjen shtetërore KAYO. Ajo kontrollon 80 për qind të Timak Defence.

Yeffet dhe Puca zotërojnë bashkërisht edhe subjekte të tjera në Shqipëri të lidhura me grupin Timak. Mes tyre janë TIMAK AVIATION dhe UNO18, aktive në prodhimin dhe tregtimin e armatimit, si dhe disa kompani të tjera.