“Sot luajmë 5 minuta më tepër dhe kjo është shumë”, trajneri i Interit shpjegon si ka ndryshuar futbolli

Kristian Kivu flet për ritmin e ri të Serisë A: Pesë minuta lojë efektive më shumë janë shumë

Trajneri i Interit, Kristian Kivu, ka dalë para mediave në prag të përballjes me Parmën. Në konferencën për shtyp, vëmendja u zhvendos te mënyra se si ka evoluar futbolli në kampionatin italian.

Tekniku zikaltër u pyet për ndryshimet në Serinë A dhe theksoi se intensiteti është rritur ndjeshëm. Sipas tij, futbolli modern kërkon më shumë kohë efektive në fushë, një element që ka ndryshuar qasjen e skuadrave.

Kivu vlerësoi se sot luhen pesë minuta më shumë lojë reale. Për të, kjo shtesë nuk është aspak e papërfillshme.

“Besoj se problemet e një sistemi, të një kulture futbolli, nuk mund të ndryshohen brenda dy muajve, ashtu siç nuk mund të vihen re përmirësime në një kohë kaq të shkurtër.

Sot, nuk e mendon më humbjen e kohës sepse rregullat nuk e lejojnë. E di që nëse rrëzohesh dhe duhet të dalësh nga fusha, e lë skuadrën me 10 lojtarë për një minutë. Portieri e di se duhet ta ekzekutojë shpejt goditjen, edhe nëse i kanë rënë mbrojtëset e kërcirit. Kjo e përshpejton lojën.

Sot kemi 5 minuta më shumë lojë efektive dhe kjo është shumë. Duhet të përshtatesh me lojën. Ka një shpenzim më të madh energjie. Duhet të futesh menjëherë në realitetin e futbollit të sotëm”, u shpreh Kristian Kivu.

Ai shtoi se rregullat e reja nuk e favorizojnë më zvarritjen e kohës. Çdo ndërprerje e panevojshme ndëshkohet. Lojtarët e dinë se dalja e përkohshme nga fusha e lë ekipin me një mungesë për rreth 60 sekonda.

Edhe portierët, sipas tij, janë të detyruar të veprojnë shpejt. Edhe kur pajisjet mbrojtëse nuk janë në vend, rivënia në lojë nuk vonohet.

Ky ritëm i ri sjell konsum më të lartë fizik. Prandaj, skuadrat duhet të përshtaten menjëherë me kërkesat e futbollit aktual./ABC24.AL/