Skandali i ri, Kina spiunoi shefin e “Nvidia”, presidenti Trump e dinte dhe heshti!

**Skandali i ri: Kina dyshohet se spiunoi kreun e Nvidia-s, Trump e dinte por zgjodhi të heshtte**

Donald Trump ishte njoftuar për çështje, por nuk ndërhyri. Kështu e përshkruan The New York Times një investigim në të cilin Kina dyshohet se ka spiunuar Jensen Huangin, drejtorin ekzekutiv të gjigantit amerikan Nvidia. Sipas gazetës, presidenti e ka ditur, por ka heshtur nga frika se një reagim mund të dëmtojë shitjet e çipave drejt Pekinit.

Qendër të hetimit zë Alice Huang, drejtuesja e kompanisë Megaspeed me bazë në Singapor. Autoritetet amerikane dyshojnë se ajo mund të ketë lidhje me shërbimet kineze të inteligjencës.

CIA e vendosi nën mbikëqyrje, pasi lindën dyshime se mund të ndihmonte në dërgimin e çipave të avancuar të Nvidia-s drejt Kinës, duke anashkaluar kufizimet amerikane.

Hetuesit besojnë se ajo ka krijuar një marrëdhënie të afërt me Jensen Huangin. Kjo ka ngritur shqetësime për mundësinë e rrjedhjes së informacioneve të ndjeshme, si mbi kompaninë, ashtu edhe mbi strategjinë e administratës amerikane ndaj Pekinit.

Nga qershori 2024 deri në shkurt 2026, Megaspeed dhe bizneset e lidhura me të kanë blerë pajisje me vlerë të paktën 4.8 miliardë dollarë. Autoritetet dyshojnë se një pjesë e çipave mund të jetë transferuar në mënyrë të paligjshme në Kinë. Vetë Megaspeed ofron kapacitete kompjuterike për kompani kineze, ndër to edhe Alibaba-n.

Sipas The New York Times, Trump u njoftua për rezultatet e hetimit rreth një vit më parë. Por vendosi të mos vepronte, që të mos rrezikonte interesat ekonomike të Nvidia-s dhe marrëdhëniet tregtare me Kinën.

Nvidia i ka hedhur poshtë dyshimet. Sipas kompanisë, Megaspeed thjesht është një klient si shumë të tjerë, ndërsa kontaktet e Jensen Huangin me drejtuesen kanë qenë normale. Alice Huang nuk ka dhënë komente, kurse Pekini i ka cilësuar akuzat si shpifje.

Hetimi mbetet i hapur. Ende nuk është sqaruar nëse janë transmetuar informacione sekrete apo nëse do të ngrihen akuza konkrete.