Situata e zjarreve, “Mbrojtja”: Tetë vatra ende aktive. Operacionet vijojnë në Dibër, Lezhë, Tiranë e Shkodër

Situata e zjarreve aktive në vend vijon të mbetet nën kontroll, sipas përditësimit operacional të Ministrisë së Mbrojtjes. Nga 27 vatrat e regjistruara në total, 17 janë shuar plotësisht dhe 2 të tjera ndodhen ende nën mbikëqyrje. Tetë vatra flakësh vazhdojnë të jenë aktive sipas informacionit të orës 20:00 të datës 3 shtator.

Menaxhimi i situatës mbështetet në një angazhim të koordinuar mes strukturave vendore dhe qendrore. Në terren janë angazhuar 265 forca operacionale dhe 38 automjete zjarrfikëse. Këtyre u janë bashkuar edhe 170 ushtarë dhe 3 automjete të Forcave të Armatosura. Helikopterët e Forcës Ajrore kanë kryer gjithashtu katër ndërhyrje ajrore.

Vëmendja kryesore është përqendruar në katër qarqe: Dibër, Lezhë, Tiranë dhe Shkodër. Në Dibër, lufta me flakët vijon në Vajkal, Lundër-Madhës dhe Mallunxë-Lis. Forcat tokësore dhe mbështetja ajrore po operojnë në zonat e Matit, megjithatë sipas raportimeve nuk ekziston rrezik për fshatrat e banuara.

Në malin e Dajtit, pavarësisht riaktivizimit të një vatre, autoritetet informojnë se rreziku për banesat është i minimizuar. Atje janë dërguar 60 forca operacionale për të kontrolluar situatën.

Problematika më e madhe paraqitet në Qarkun e Lezhës. Zona më kritike është ajo ndërmjet Kalivacit, Zimajit dhe Kashnjetit, ku u detyrua evakuimi i banorëve. Për të përforcuar ndërhyrjen u mobilizuan dy helikopterë, 50 ushtarë dhe tri mjete zjarrfikëse, shtu strukturave vendore. Në fshatin Mnelë e Vogël në Vau i Dejës, intensiteti i zjarrit është reduktuar dhe rreziku për zonat e banuara është parandaluar, ndërsa puna për shuarjen finale vazhdon.

Agjencia Kombëtare e Mbrojtjes Civile ndjek situatën në të gjithë territorin në koordinim të ngushtë me prefekturat dhe bashkitë. Të gjitha strukturat e sistemit të Mbrojtjes Civile janë vënë në gatishmëri. "Kapacitetet operacionale mbeten të angazhuara në terren dhe të përgatitura për të ndërhyrë aty ku e kërkon situata, me prioritet mbrojtjen e jetës, banesave dhe pronës së qytetarëve," thuhet në njoftimin përfundimtar.