Si i mbijetoi amerikanja injeksionit vdekjeprurës dhe çfarë ndodhi gjatë dy orëve në dhomën e ekzekutimit?

Tentativa për ekzekutimin e Christa Pike në Tennessee dështoi. E dënuara i mbijetoi dy dozave me pentobarbital dhe u dërgua më pas në spital. Dëshmitarë të ngjarjes ishin gazetarët e Associated Press, të cilët publikuan detaje nga brenda dhomës së ekzekutimit.

Pike mban dënimin me vdekje për torturimin dhe vrasjen e 19-vjeçares Colleen Slemmer në vitin 1995. Para nisjes së injeksionit vdekjeprurës ajo tha se ndjehej e qetë.

Sot Pike është 50 vjeçe. Në kohën e krimit ishte 18 vjeçe. Nëse procedura do të përmbyllej, ajo do të bëhej gruaja e parë e ekzekutuar në Tennessee pas më shumë se 200 vitesh.

Sipas AP-së, e dënuara ishte e lidhur në barelë me linjë intravenoze në dorë. Në orën 19:27 zyrtarët e burgut ngritën perden që ndante dhomën ku ndodhej ajo nga salla e dëshmitarëve.

Rreth orës 19:30 asaj iu dha e drejta për deklaratën e fundit. “Jam gati të jem e lirë. Kjo është një ditë e lumtur”, tha Pike.

Pranë barelës qëndronte këshilltari i saj shpirtëror. Ai bisedoi me të dhe këndoi një këngë ku përsëritej fraza “Të dua”. Pike ngrinte kokën, shihte përreth dhe buzëqeshte. Më pas u ankua se i dhembte krahu. Pyeti një zyrtar nëse ishte normale ta ndjente këtë dhimbje.

Në orën 19:46 perdja u ul. U ngrit sërish tri minuta më vonë. Protokolli i Tennessee-t parashikon një dozë të dytë pentobarbitali kur i dënuari nuk ndërron jetë pas të parës.

Pas injeksionit të dytë, Pike nisi të lëshonte tinguj të ngjashëm me gërhitjen. Megjithatë ajo vazhdoi të merrte frymë. Kjo gjendje zgjati rreth një orë.

Avokati i saj, Randy Spivey, deklaroi se rreth orës 20:22 kërkoi telefon. Donte të kontaktonte kolegët e ekipit mbrojtës. Ai kërkoi gjithashtu ndërprerjen e procedurës dhe dhënien e ndihmës mjekësore.

Rreth orës 20:50 erdhi konfirmimi se ambulanca ishte nisur. Automjetet e zjarrfikëses dhe të emergjencës mbërritën para burgut rreth orës 21:14.

Departamenti i Burgjeve në Tennessee tha se veproi sipas protokollit. Nuk dha shpjegime se çfarë shkoi keq. Guvernatori Bill Lee urdhëroi rishikimin e procedurës. Ai shtyu gjithashtu një ekzekutim tjetër të parashikuar për më vonë gjatë këtij viti.

Nëna e viktimës, May Martinez, kishte udhëtuar drejt Nashville për të ndjekur ekzekutimin. “Nuk mora drejtësi për vajzën time”, tha ajo për AP. “Kjo nuk është drejtësi për Colleen”, shtoi ajo.

Rasti, ku e dënuara i mbijetoi dy injeksioneve vdekjeprurëse, ka sjellë reagime. Ndërkohë mjekët po përpiqen t’i shpëtojnë jetën Pike.