Shtohen telashet për Granit Xhakës, dyshohet se përdori certifikatën e falsifikuar të vaksinimit në SHBA

Prokuroria e Luzernës ka hapur prej disa ditësh një hetim ndaj Granit Xhakës për dyshimet mbi falsifikimin e certifikatës së vaksinimit anti-Covid. Në fillim të tetorit mesfushori pritet të thirret për t'u marrë në pyetje nga organet hetimore.

Vetë futbollisti e ka pranuar shkeljen dhe ka kërkuar falje publike. Pas kësaj ai u la jashtë grumbullimit të Zvicrës për ndeshjet e Nations League.

Por dosja ndaj tij rrezikon të rëndohet. Telashet nuk mbarojnë këtu.

Sipas gazetës zvicerane "Tages-Anzeiger", Xhaka ka udhëtuar drejt Shteteve të Bashkuara me dokumentin e falsifikuar në korrik të vitit 2022. Në atë kohë ai luante ende për Arsenalin. Me këtë veprim dyshohet se ka mashtruar edhe autoritetet doganore amerikane.

Gjatë asaj periudhe, Shtetet e Bashkuara u kërkonin shtetasve të huaj të dëshmonin vaksinimin kundër Covid-19 përmes paraqitjes së një testi negativ. Edhe pse detyrimi për të shfaqur testin u shfuqizua më 12 qershor 2022, kufizimet për udhëtarët e pavaksinuar mbetën në fuqi deri në maj të vitit 2023.

Pikërisht për këtë arsye disa yje të Premier League nuk udhëtuan me klubet e tyre në turnetë verore në SHBA.

Chelsea, për shembull, i la në Londër N'Golo Kante dhe Ruben Loftus-Cheek. Manchester City udhëtoi gjithashtu pa Phil Foden, John Stones dhe İlkay Gündogan.