Shqipëria përgatitet për EURO U-21 2027, UEFA vizitë inspektuese në stadiumet pritëse -

Shqipëria po merr hapa konkretë drejt organizimit të Kampionatit Europian për U-21 në vitin 2027, ku do të jetë bashkëpritese e këtij turneu të rëndësishëm. Një delegacion nga selia qendrore e UEFA-s ndodhet aktualisht në vendin tonë për të inspektuar nga afër mundësitë infrastrukturore.

Vizita e ekspertëve evropianë ka si qëllim vlerësimin e gatishmërisë së stadiumeve që do të akomodojnë ndeshjet. Njëkohësisht, po intensifikohet puna për koordinimin e detajeve të organizimit në prag të eventit.

Në krye të delegacionit të UEFA-s qëndron Guillaume Poisson, Shef i Operacioneve për Turnetë në kuadër të Njësisë së Menaxhimit të Turneve dhe Eventeve. Ekspertët kanë nisur inspektimet në terren me stadiumet "Loro Boriçi" në Shkodër dhe "Elbasan Arena".

Të enjten, vëmendja do të përqendrohet në kryeqytet. Para vizitës në "Air Albania", delegacioni do të shohë nga afër edhe "Arena e Demave", stadiumi i klubit Partizani.

Ky proces inspektimi është pjesë e përgatitjeve të përbashkëta midis UEFA-s, Federatës Shqiptare të Futbollit dhe autoriteteve lokale. Qëllimi është të garantohen të gjitha kushtet sipas standardeve të kërkuara nga organi qeverisës i futbollit europian.

Për Shqipërinë, EURO U-21 2027 vjen si një mundësi e madhe. Vendi do të vazhdojë rrugën e suksesshme në organizimin e eventeve ndërkombëtare, duke ofruar një platformë të re për promovimin e qyteteve pritëse dhe zhvillimin e futbollit.

Përgatitjet do të vijojnë me intensitet në muajt në vijim. Bashkëpunimi i ngushtë me UEFA-n dhe përgatitja e infrastrukturës do të jenë në qendër deri në nisjen zyrtare të turneut.