Shpërthimi te karburanti në “Brryl”, 2 pistat e hetimit! Zbardhen dëshmitë e punonjësve, nga pompa me defekt, te rrjedhja e gazit

Stacioni i karburantit "EIDA" në zonën e Brrylit, Tiranë, u përfshi nga shpërthimi më 9 shtator. Shkaku i ngjarjes mbetet ende i paqartë për grupin hetimor, i cili vijon punën për të përcaktuar origjinën e saktë të INCIDENTIT.

Hetuesit kanë thirrur në dëshmi tre punonjësit që u lënduan gjatë shpërthimit. Dëshmitë e tyre kanë ndihmuar në ngritjen e tre pistave kryesore hetimi. Të tre ata janë shprehur se po furnizonin me gaz një automjet në sheshin e pikës në ato momente. Sipas tyre, gjithçka ndodhi brenda pak sekondave dhe nuk arritën të kuptojnë menjëherë burimin e problemit.

Ekspertët kanë konstatuar se pranë godinës që u dëmtua rëndë ndodhej edhe një bombol gazi. Ky fakt ka shtuar dyshimet për një rrjedhje të mundshme ose defekt të pajisjeve ndihmëse, sipas informacioneve nga "News 24".

Aktualisht, hetimet po zhvillohen në tre drejtime të qarta. E para analizon vetë automjetin që po furnizohej, për të verifikuar nëse ekzistonte një defekt në sistemin e tij të gazit. E dyta përqendrohet në mundësinë e një avarie në pompën e vetë stacionit. Së fundi, e treta ka të bëjë me verifikimin e bombolës së gazit të gjetur aty pranë, për të parë nëse ka rrjedhur gaz në mjedis dhe është ndezur nga një shkëndijë elektrike apo burim tjetër.