Shpërthen Farruku në miqësore te Dinamo, 3 gola për fitoren e thellë ndaj Otrant Olympic

Dinamo ka marrë një fitore bindëse 4-1 në miqësoren e pasdites së sotme ndaj Otrant Olympic. Përballë ishte skuadra shqiptare nga Ulqini, kryesuese e kampionatit në Malin e Zi. Miqësorja me karakter vëllazëror dhuroi futboll të këndshëm dhe gola. Blutë e Ilir Dajës konfirmuan momentin e mirë në këtë nisje sezoni.

Trajneri Daja e nisi takimin me këtë njëmbëdhjetëshe: Kiri; Ismaili, Sembene, Alhassan, Lorran, Vila, Meta, Ajzeraj, Ruçi, Farruku, Mustapha.

Blutë e morën shpejt lojën në dorë. Qarkulluan mirë topin dhe kërkuan me këmbëngulje portën kundërshtare. Avantazhi erdhi në minutën e 12-të. Farruku finalizoi saktë pas një pasimi fantastik të Ajzerajt.

Otrant Olympic reagoi menjëherë. Barazoi shifrat në minutën e 16-të. Gëzimi i miqve zgjati shumë pak. Vetëm gjashtë minuta më pas Dinamo kaloi sërish në epërsi. Ruçi goditi bukur me volej pas asistit të Skënder Metës. Ishte goli i dytë për blutë.

Në fundin e pjesës së parë erdhi edhe i treti. Farruku u shfaq protagonist sërish. Ai shënoi pas një asisti perfekt të Ismailit. Skuadra shkoi në pushim me avantazhin 3-1.

Pjesa e dytë nisi me tre zëvendësime. Sali, Xhejms dhe Manellari morën vendet e Kirit, Ismailit dhe Vilës. Edhe pas pushimit Dinamo mbajti kontrollin. Krijoi raste të tjera shënimi.

Në minutën e 65-të Daja ndërhyri sërish. Meta, Sembene dhe Mustapha lanë fushën. Në vend të tyre u futën Jonathan, Gudiabi dhe Nani. Në minutën e 73-të erdhën ndryshime të tjera. Lorran, Ruçi dhe Ajzeraj u zëvendësuan nga Rama, Bleta dhe Lushaku.

Vetëm dy minuta më vonë erdhi goli i katërt. Farruku kompletoi tripletën personale. Ishte rrjeta e tretë e tij dhe e katërta për Dinamon.

Në minutën e 77-të u kryen dy zëvendësimet e fundit. Biden, i cili aktivizohet me ekipin B të Dinamos, mori vendin e Farrukut. Kruja u hodh në fushë në vend të Alhassan. Në minutat e mbetura rezultati nuk ndryshoi. Ndeshja u mbyll 4-1 për Dinamon.