Shefi i Shtabit të Përgjithshëm të Forcave të Armatosura takon ambasadorin amerikan në Tiranë, ja detajet nga takimi

Gjenerallejtënant Arben Kingji priti sot në takim ambasadorin e SHBA-së në Shqipëri, Eric Wendt.

Lajmi u bë publik nga vetë Shefi i Shtabit të Përgjithshëm të Forcave të Armatosura. Ai ndau në rrjetet sociale disa fotografi nga takimi.

Gjatë bisedës, Kingji vlerësoi ndihmën e pandërprerë të Uashingtonit për sektorin e mbrojtjes. Theksi u vu te modernizimi i kapaciteteve operacionale dhe ushtarake të Forcave të Armatosura.

Ai nënvizoi gjithashtu vullnetin për të thelluar bashkëpunimin dypalësh. Qëllimi mbetet forcimi i sigurisë kombëtare dhe asaj kolektive.

Në postimin e tij Kingji shkroi: “Kënaqësi të zhvilloja një takim me Ambasadorin e Shteteve të Bashkuara të Amerikës, Sh.T.Z. Eric Wendt. Gjatë takimit, shpreha mirënjohjen për mbështetjen e vazhdueshme të partnerit tonë strategjik në fushën e mbrojtjes, veçanërisht në drejtim të modernizimit të kapaciteteve operacionale dhe ushtarake të Forcave të Armatosura. Theksova angazhimin për thellimin e mëtejshëm të bashkëpunimit dhe forcimin e sigurisë kombëtare dhe kolektive”.