SHBA tërheq të gjithë bombarduesit nga RAF Fairford

Të gjithë bombarduesit amerikanë të dislokuar në bazën britanike RAF Fairford janë tërhequr. Konfirmimi erdhi nga Forcat Ajrore të Shteteve të Bashkuara.

Në një njoftim zyrtar, pala amerikane bëri të ditur se avionët e saj bombardues zhvillojnë rregullisht operacione në rajone të ndryshme të globit. Sipas saj, këto dislokime lidhen me stërvitjen e trupave dhe me nevojat operative, transmeton ABC24.AL.

Ushtria amerikane sqaroi edhe vonesën në njoftim. “Për shkak të kërkesave të sigurisë operacionale, nuk kemi mundur të konfirmojmë në kohë reale lëvizjen e mjeteve dhe forcave tona. Megjithatë, tani mund të konfirmojmë se të gjithë bombarduesit amerikanë që ishin dislokuar në RAF Fairford janë rikthyer në bazat e tyre në Shtetet e Bashkuara”, thuhet në deklaratë.

Më tej, Uashingtoni theksoi se gatishmëria mbetet e plotë. Personeli që operon me flotën e bombarduesve strategjikë B-1, B-2 dhe B-52 është në dispozicion për misione goditjeje me precizion të lartë në çdo zonë të botës.

Sipas Forcave Ajrore, edhe bazat në territorin kontinental amerikan ofrojnë të njëjtën kapacitet. Prej andej mund të ndërmerren operacione duke ruajtur aftësinë për të vepruar “kudo dhe në çdo kohë”.

RAF Fairford konsiderohet një ndër pikat kryesore që SHBA shfrytëzon në Evropë. Aty dislokohen dhe operojnë zakonisht bombarduesit strategjikë amerikanë. /ABC24.AL/