Sfida me Finlandën në Ligën e Kombeve, FSHF udhëzon tifozët shqiptarë në Helsinki, nga grumbullimi te hyrja në stadium

Kuqezinjtë luajnë këtë të shtunë ndeshjen e tretë të grupit në UEFA Nations League. Përballë do të kenë Finlandën në "Helsinki Olympic Stadium". Takimi nis në orën 15:00.

FSHF ka njoftuar të gjithë tifozët shqiptarë që kanë udhëtuar në Finlandë dhe do të mbështesin Kombëtaren nga shkallët e stadiumit, lidhur me organizimin në ditën e ndeshjes. Pika e grumbullimit është caktuar te "Old Irish Pub" në Helsinki.

Sipas planit, po të shtunën më 3 tetor, në orën 12:00, tifozët do të nisen së bashku nga lokali drejt stadiumit. Aty Shqipëria do të përballet me Finlandën.

Federata fton të gjithë mbështetësit shqiptarë që ndodhen në Helsinki t'i bashkohen grupit në pikën e takimit. Ajo kërkon mbështetje të vazhdueshme për ekipin kuqezi gjatë gjithë ndeshjes, në mënyrë korrekte dhe me respekt të plotë për rregullat e stadiumit.