Senatori republikan sulmon prokurorin e Smith, por ngatërron faktet

Tentativa e senatorit republikan Eric Schmitt për të vënë në pozitë të vështirë ish-prokurorin special Jack Smith në Komisionin e Drejtësisë së Senatit u kthye në një gafë për vetë ligjvënësin.

Schmitt e akuzoi Smithin se kishte gënjyer nën betim për vendndodhjen e tij më 3 shkurt 2024. Sipas pretendimit të senatorit, ish-prokurori atë ditë kishte qenë në Atlanta. Atje ai kishte ndjekur ndeshjen e NBA-së mes Atlanta Hawks dhe Golden State Warriors.

Gjatë pyetjeve, Schmitt e pyeti drejtpërdrejt nëse kishte qenë në Atlanta. Ai e paralajmëroi të mendohej mirë para se të përgjigjej, pasi sipas tij Smith kishte dhënë më parë dëshmi të rreme nën betim.

Smith e hodhi poshtë pretendimin. Ai tha se nuk kishte qenë në ndeshjen e Atlanta Hawks. Në vend të kësaj, kishte ndjekur një tjetër ndeshje basketbolli po atë ditë.

Në realitet, Smith ndodhej në College Park të Marylandit. Atje ai kishte parë ndeshjen e basketbollit universitar për femra mes Maryland dhe Iowa-s. Kishte shkuar enkas për të ndjekur yllin e Iowa-s, Caitlin Clark.

Gabimi i Schmittit lidhej me emrat e ekipeve. Ai ngatërroi Hawks, skuadrën e NBA-së nga Atlanta, me Hawkeyes, nofkën e ekipit universitar të Iowa-s.

Lapsusi u vu në dukje menjëherë nga senatorja demokrate Amy Klobuchar. Ajo i tha kolegut se duket se kishte ngatërruar Hawkeyes me Hawks. Gjithashtu kërkoi që Smithit t'i kërkohej falje për trajtimin gjatë seancës.

Jack Smith ka qenë prokuror special në dy hetime federale ndaj Donald Trumpit. Njëri prej tyre kishte të bënte me përpjekjet për të përmbysur rezultatin e zgjedhjeve presidenciale të vitit 2020 dhe me ngjarjet që çuan në sulmin ndaj Kapitolit më 6 janar 2021. Hetimi tjetër fokusohej te dokumentet e klasifikuara që Trumpi kishte mbajtur në rezidencën e tij në Mar-a-Lago.

Smith ka deklaruar se po të mos ishte rizgjedhur president, provat e mbledhura do të kishin mjaftuar për një dënim në çështjen e zgjedhjeve të vitit 2020. Në seancën në Senat ai mbrojti punën e tij dhe rrëzoi pretendimet se hetimet ndaj Trumpit ishin të motivuara politikisht. /ABC24.AL/