“Sarajevo Safari” – a gjuanin zviceranët e pasur civilë gjatë luftës në Bosnje? -

"Sarajevo Safari" – cilësimi që i jepet pretendimit se të pasur nga Evropa Perëndimore kishin paguar për të qëlluar civilë gjatë rrethimit të Sarajevës në Luftën e Bosnjës, ende ngjall debates të forta. Sipas versioneve, turistë të pasur nga disa vende europiane kishin shkuar në kodrat përreth kryeqytetit boshnjak në fillim të viteve 1990, duke paguar për ta kthyer në gjueti njerëzish.

Ekspertët ende i vënë në dyshim këto akuza të rënda. Megjithatë, hetime zyrtare janë hapur në disa vende. Zyrës së Prokurorit Publik në Milano i ka shkuar çështja në shkurt të këtij viti. Hetuesit austriakë dhe belgë po shqyrtojnë gjithashtu mundësinë e ndjekjes penale.

Kallëzime penale janë paraqitur edhe në Zvicër. Autoritetet zvicerane, sipas gazetës Blick, kanë pranuar dokumente që përmesinformacione për persona të mundshëm të përfshirë, si dhe për ata që mund të kenë qenë në dijeni. Zëdhënësi i Prokurorisë Federale, Maximilian Tikhomirov, e konfirmoi pranimin e tyre, pa dhënë hollësi. Ai theksoi vetëm se kallëzimet po shqyrtohen sipas procedurës së zakonshme dhe se ende nuk është hapur asnjë procedim penal.

Nuk është ende e qartë nëse ekziston dyshimi i mjaftueshëm për një vepër penale dhe nëse Prokuroria Federale zvicerane është kompetente për këtë çështje.

Italianët kanë shkuar më përpara në hetimet e tyre. Në muajin shkurt, u mor në pyetje një 80-vjeçar nga Italia e Veriut, i njohur për pikëpamje të ekstremit të djathtë. Ai dyshohet se ka mburrur se ka qëlluar mbi njerëz të paarmatosur vetëm për argëtim, por i ka mohuar kategorikisht akuzat.

Akuzat nuk janë të reja. Pretendimet rreth "Sarajevo Safari" qarkullojnë prej dekadash. Shtysa e fundit për hetime erdhi nga autori italian Ezio Gavazzeni. Me një ekip të vogël, ai hulumtoi pretendimet se të huaj të pasur kishin paguar dhjetëra mijëra franga tek ushtarët serbë, për të pasur mundësinë të qëllonin civilë në Sarajevë.

Sipas versionit të tij, pagesat mund të arrinin deri në 25 mijë euro për një burrë të vrarë, 40 mijë euro për një grua dhe rreth 50 mijë euro për një fëmijë. Gavazzeni boton librin *I cecchini del weekend* ("Snajperët e fundjavës"), i cili tërhoqi vëmendje ndërkombëtare.

Megjithatë, disa ekspertë kanë shprehur dyshime për gjuetinë sistematike dhe kanë theksuar mospërputhje në hulumtimet e autorit. Dy dëshmitarë kryesorë u distancuan më vonë nga disa pretendime të paraqitura në libër.

Në lidhje me pjesëmarrjen e zviceranëve, Gavazzeni deklaroi në mars për SonntagsZeitung: "Po, në gjuetinë e njerëzve kishte edhe zviceranë". Tani ai pretendon se bëhet fjalë për zviceranë dhe italianë të lidhur me një tregtar arti në Lugano. Ky grup, sipas tij, udhëtonte së bashku drejt Bosnjës për "Sarajevo Safari". Tregtari nga Lugano, pretendon Gavazzeni, nuk mori pjesë vetë në vrasje, por dëgjoi në detaje për to. Dy burime të pavarura e konfirmojnë këtë version.

Deri tani, megjithatë, nuk ekzistojnë prova të forta që vërtetojnë pretendimet. Pyetja mbetet: a bëhet fjalë për një legjendë urbane të vjetër, apo këto histori kanë bazë reale?

Për të ndihmuar në zbardhjen e ngjarjeve, në fund të qershorit u mbajt në Hagë, në selinë e Eurojust, takimi i hetuesve nga Italia, Austria, Bosnje-Hercegovina dhe Belgjika. Ata shkëmbyeruan rezultatet e hetimeve mbi krimet e dyshuara të luftës.

Tani, Prokuroria Federale zvicerane duhet të vlerësojë nëse informacionet e paraqitura janë të mjaftueshme për të nisur një procedim penal. Për këtë qëllim, ajo është në kontakt me drejtësinë italiane. Deri më tani, Italia nuk ka dërguar një kërkesë zyrtare për ndihmë juridike në Zvicër.