Rutte me mesazh të prerë drejt Putinit: Nuk mund të na përçajë rreth Ukrainës

Shefi i NATO-s, Mark Rutte, e ka akuzuar Kremlinin se po synon të ndajë aleatët perëndimorë. Sipas tij, Moska po kërkon t'i frenojë vendet partnere që të mos vazhdojnë ndihmën për Kievin.

Duke folur për këtë çështje, Rutte dha një mesazh të drejtpërdrejtë. “Kremlini po përpiqet të na përçajë dhe të na zmbrapsë nga mbështetja për Ukrainën. Mesazhi ynë është i qartë: ruani qetësinë, vazhdoni përpara dhe vazhdoni mbështetjen për Ukrainën”, tha ai.

Ai nënvizoi se pasojat e konfliktit nuk po rëndojnë vetëm mbi Ukrainën. Edhe Rusia po i ndjen ato çdo ditë.

“E gjithë Rusia po paguan një çmim të madh për luftën që ai ka zgjedhur”, deklaroi kreu i Aleancës, ndërsa i referohej presidentit rus Vladimir Putin.

Sipas Ruttes, çdo muaj dhjetëra mijëra të rinj rusë po dërgohen drejt vdekjes në front. Ai kritikoi ashpër udhëheqjen në Moskë për insistimin në vazhdimin e agresionit.

Shefi i Aleancës vlerësoi se Rusia nuk po i arrin qëllimet në fushëbetejë. Përpjekjet për të trembur shtetet që ndihmojnë Ukrainën, shtoi ai, kanë dështuar.

“Ai po dështon në fushëbetejë dhe po dështon të na frikësojë”, tha Rutte.

Ndërkohë, mediat perëndimore raportojnë se bilanci i ushtarëve rusë të vrarë në luftën për pushtimin e Ukrainës ka kaluar shifrën e një milioni.