Rishikohen masat e sigurisë! Pas votimit në Kuvend, afat për ata që janë në burg (VIDEO)

Rishikimi i masave të sigurisë, çfarë ndryshon për të paraburgosurit pas votimit në Kuvend

Të gjithë personat që ndodhen në paraburgim do të kenë mundësi të kërkojnë lirimin. Hetimi ndaj tyre do të vazhdojë normalisht. Këtë e mundëson ndryshimi i parashikuar në Kodin e Procedurës Penale.

Sipas dokumentit tashmë zyrtar, nisma i takon vetë të ndaluarve. Ata mund të kërkojnë rishikimin e masës së sigurisë sapo ligji të miratohet në Kuvend dhe të hyjë në fuqi. E drejta ushtrohet menjëherë.

Gjykata ka detyrimin të verifikojë përputhshmërinë e masave brenda dy muajve. Me përparësi do të trajtohen kërkesat dhe verifikimet kryesisht për masën e arrestit në burg. Ato duhet të shqyrtohen brenda tre ditëve nga paraqitja ose nisja.

Siç raporton A2 CNN, përparësia dhe afati treditor vlejnë për çdo rast ku baza ligjore për arrest me burg nuk lejohet më nga ky ligj. Për rastet e tjera, kontrolli do të kryhet brenda një muaji.

Të drejtë propozimi kanë edhe prokurorët. Nëse konstatojnë se një masë sigurie nuk përputhet më me kriteret e Kodit, ata duhet t'i drejtohen pa vonesë gjykatës kompetente. Kërkesa synon revokimin ose zëvendësimin e saj.

Projektligji saktëson se aktet dhe provat e siguruara nga prokuroria para hyrjes në fuqi nuk preken. Ato mbeten të vlefshme. Mund të përdoren në çdo procedim vijues apo të mëvonshëm, pavarësisht rregullimeve të reja që sjell ligji.