“Reformë për qytetarët dhe jo për ofiqarët”- Mazniku shpjegon “Territorialen”: Shumë bashki nuk kryejnë dot funksionet! Do e vendosë Kuvendi

Arbjan Mazniku, bashkëkryetari socialist i Komisionit për Reformën Territoriale, shpjegoi arsyet që shtynë Partinë Socialiste të propozojë reduktimin e bashkive nga 61 në 46. Ai theksoi se shumë bashki aktuale nuk arrijnë të përmbushin detyrimet ligjore për mungesë burimesh njerëzore e financiare.

Sipas Maznikut, analiza e kryer evidentoi se vetëm gjysma e bashkive funksionojnë plotësisht. Shembuj si Rrogozhina e Divjaka, sipas tij, vuajnë nga mungesa e një bërthame urbane, çka e vështirëson rekrutimin e stafit të specializuar. “Nëse nuk ke njerëzit dhe mundësinë ekonomike për kryerjen e funksioneve, atëherë ke një problem serioz”, u shpreh ai në emisionin “Repolitix” në Report TV.

Mazniku garantoi qytetarët se shërbimet e përditshme do të mbeten në vendet e tyre. Lëvizje do të ketë vetëm për zyrat e planifikimit, jo për ato që ofrojnë ndihmë direkte. Ai ilustroi gjendjen me analogjinë e administratorit të një pallati: nëse banori i vetëm është ai vetë, atëherë ai administon veten, jo të tjerët.

Reforma, sipas deputetit socialist, nuk synon avantazhin e funksionarëve, por përmirësimin e jetës së popullsisë. “Kjo është një reformë për qytetarët, jo për ofiqarët”, deklaroi ai, duke shtuar se vullneti i PS është që hartën e re ta adoptsë Kuvendi para zgjedhjeve të ardhshme lokale.

Mazniku vuri në dukje nevojën për një fazë të dytë të reformës. Kjo përfshin rishikimin e Ligjit 139 për funksionet bashkiake, i cili nuk është prekur që nga viti 2014. “Pas një dekade është koha të shohim nëse këto kompetenca u zbatuan apo jo”, përfundoi ai.