Reforma Territoriale/ Elezi: Bashki me më pak kosto, më shumë shërbime dhe staf të specializuar në bujqësi

Reforma e re territoriale do të sjellë shërbime më të mira për qytetarët dhe administrim më cilësor në nivel vendor. Kështu deklaroi deputeti i Partisë Socialiste, Ermal Elezi. Ai theksoi se një nga objektivat kryesorë është ulja e kostove administrative.

Sipas Elezit, njësitë e reja vendore do të pajisen me kompetenca më të zgjeruara. Ato do të kenë edhe personel të specializuar. Fokusi kryesor do të jetë sektori i bujqësisë.

Komentet ai i bëri gjatë një interviste në emisionin “NewsRoom” në ABC News. Aty shpjegoi se boshti i ndryshimeve lidhet me tre shtylla kryesore. Bëhet fjalë për shërbimet, financat dhe administrimin.

Elezi pranoi se reforma ka hapur debat. Ka edhe paqartësi se si do të funksionojë në praktikë ndarja e re territoriale. Megjithatë, ai garantoi se qytetarët nuk do të kenë vështirësi në marrjen e shërbimeve.

“Zemra e reformës janë shërbimet, financat dhe administrimi. Diskutimet për këtë reformë janë të natyrave të ndryshme dhe kanë të bëjnë edhe me një pasiguri se çfarë mund të ndodhë me këto ndryshime. Por të gjitha shërbimet do të jenë pranë qytetarëve. Në paketën e shërbimeve që do të kenë mundësi të ofrojnë bashkitë e reja, do të jenë shumë funksione që kanë munguar”, deklaroi Elezi.

Deputeti socialist u ndal edhe te efektet financiare të riorganizimit. Ai tha se pritet një ulje e shpenzimeve për mbajtjen e administratës. Në të njëjtën kohë, struktura e re do të jetë më profesionale dhe më e aftë për t'iu përgjigjur kërkesave të banorëve.

Vëmendje e posaçme do t'i kushtohet bujqësisë. Elezi nënvizoi se bashkitë duhet të krijojnë kapacitete me specialistë të fushës. Qëllimi është shfrytëzimi i fondeve të Bashkimit Evropian.

Sa i takon ndarjes territoriale, ai sqaroi skemën e menaxhimit. Bashkitë e mëdha do të mbajnë peshën e planifikimit urban. Ato do të organizojnë edhe ofrimin e shërbimeve në territor. Ndërsa njësitë administrative do të mbeten në kontakt të drejtpërdrejtë me qytetarët.

Një tjetër pikë e rëndësishme është përfaqësimi në vendimmarrje. Qytetet do të kenë anëtarët e tyre në Këshillat Bashkiakë. Kjo do t'u japë mundësi të mbrojnë interesat lokale. Zëri i tyre do të dëgjohet edhe gjatë miratimit të buxhetit.

“Në Bujqësi do të jenë disa dyer të reja të hapura. Pra duhet të kemi bashki me staf të specializuar që të përfitojnë nga këto fonde të BE që të përkthehen në përfitime për qytetarët. Mënyra se si do të menaxhohet territori është Bashkia e madhe planifiko qyteti organizon shërbimet në territor dhe njësia administrative është në shërbim të qytetarëve. Qytetet në përfaqësimin e tyre do të kenë anëtar në Këshillin Bashkiak , kur të miratohet buxheti do kenë zë në vendimmarrje”, u shpreh ai.