“Reforma nuk bëhet për ndikim elektoral”/ Mazniku: PS do e fitojë prapë Korçën, s’ndryshon asgjë

Mazniku: Harta e re pa prapavijë elektorale, Korça mbetet e PS-së

I pranishëm në “Top Story”, Arbjan Mazniku dha shpjegime mbi organizimin e ri territorial.

Ai këmbënguli se rishikimi i kufijve vendorë nuk lindi për llogari votash.

Bashkimet mes njësive, sipas tij, nuk e prekin peshoren politike në bashki.

“Korça nuk ka asnjë rrezik për PS. Në Maliq ka fituar një kryebashkiak që ka bërë nëntë mandate atje”, tha ai.

Më tej shtoi: “Nuk besoj se ka një njeri që dyshon se bashkimi i Vlorës me Selenicën, që ka sjellë dhe debatin të mirëkuptuar nga ne, ka dyshim që nga ky bashkim do ketë ndikim elektoral. Selenica dhe Vlora kur bëhen bashkë kanë potencial më të madh zhvillimi se kur janë më vete.”

Mesazhi i tij ishte i qartë.

“Se ke dy bashki apo një, nuk ndryshon asgjë. Nuk i ka ndryshuar në terma të përgjithshëm PS-së. Kalimi i Kavajës në një krah, se është i vetmi vend ku mund të ngrihet një gjysmë argument, sepse kryebashkiaku i Kavajës thotë që do fitojë sërish”, u shpreh Mazniku.

Në fund ai foli edhe për zyrat administrative.

“Godina administrative do të jetë aty. Nuk ndryshon godina. Nuk ka për të ndryshuar ky element”, theksoi ai.