Raporti i BE me kritika: Kosova të përshpejtojë reformat, Serbia të normalizojë raportet

Komisioni Europian e vlerëson se Kosova ka mbështetje të gjerë publike për anëtarësimin në BE. Por, në periudhën e fundit, bllokimet institucionale, zgjedhjet e shpeshta dhe reforma të kufizuara e kanë ngadalësuar përparimin.

Raporti thekson suksese në luftën kundër krimit të organizuar. Heqja e masave ndëshkuese ka bërë të mundur rifillimin e bashkëpunimit dhe të ndihmës financiare evropiane.

Tashmë që institucionet funksionojnë, Prishtina duhet të përshpejtojë reformat, sidomos në sundimin e ligjit. Ajo duhet të rregullojë edhe marrëdhëniet me Serbinë. Komisioni është i gatshëm të përgatisë mendimin për aplikimin e Kosovës për anëtarësim, nëse Këshilli Europian e kërkon këtë.

Për Serbinë, Brukseli shqetësohet për nivelin e përafrimit me politikën e jashtme dhe të sigurisë së BE-së. Ai kërkon përcaktim të qartë për orientimin strategjik. Përparimi në negociata kushtëzohet me normalizimin e marrëdhënieve me Kosovën.