Rama publikon të dhëna për protestuesit e dhunshëm: U paguan nga krimi i organizuar! Janë me precedentë kriminalë

Kryeministri Edi Rama ka publikuar të dhëna dhe dokumente për personat e ndaluar nga Policia gjatë protestave të dhunshme, duke pretenduar se ata nuk janë studentë dhe se janë financuar nga krimi i organizuar dhe forca të huaja. Sipas kreut të qeverisë, personat e identifikuar kanë precedentë penalë për vepra të ndryshme, ndërsa protestat paqësore të studentëve, sipas tij, janë shfrytëzuar për të nxitur përplasje dhe dhunë ndaj institucioneve.

Në deklaratën e tij, Rama u ndal te episodet e dhunës gjatë tubimeve, duke përmendur edhe ngjarjet pranë Ministrisë së Arsimit. Ai akuzoi Partinë Demokratike se ka marrë përgjegjësinë politike për dhunën e ndodhur dhe paralajmëroi publikimin e pamjeve që, sipas tij, dokumentojnë përfshirjen e personave të ndaluar në protestat e dhunshme. “Padyshim, qershia mbi tortë, glasa mbi tortë është PD. Dje mori autorësinë e dhunës te Ministria e Arsimit, e fillimit të dhunës. Unë do ndaj me ju pamje të cilat me siguri do të trondisin shumëkënd. Për shkak të konfidencialitetit, është ruajtur identiteti i personave”, deklaroi Rama.

Kryeministri sqaroi se personat për të cilët foli janë ndaluar nga Policia e Shtetit gjatë protestave dhe, sipas tij, nuk kanë lidhje me lëvizjen studentore. Ai bëri dallimin mes protestuesve që kundërshtojnë qeverinë në mënyrë paqësore dhe personave që, sipas pretendimeve të tij, kanë qenë të përfshirë në akte dhune.

“Personat që do të shihni janë subjekt dhe objekt i punës së Policisë së Shtetit. Janë të gjithë persona të ndaluar nga Policia e Shtetit në protestat e dhunshme dhe nuk janë studentë, por diçka tjetër. Nuk i përkasin dhe s’kanë lidhje me studentët, të cilët nuk i janë bashkuar kësaj dallge terrori urban, por qëndrojnë në një front proteste, protestë paqësore, protestë të lidhur me jetën e tyre të përditshme”, u shpreh kreu i qeverisë.

Sipas të dhënave të bëra publike nga Rama, personat e përmendur rezultojnë të kenë precedentë penalë për vepra të ndryshme, përfshirë prodhimin dhe shitjen e lëndëve narkotike, vjedhjen, mosbindjen ndaj urdhrave të punonjësve të policisë, dhunën në familje, mashtrimin dhe shkatërrimin e pronës.

Megjithatë, kryeministri nuk paraqiti në deklaratën e tij prova të detajuara publike që të vërtetojnë pretendimin se këta persona janë financuar nga krimi i organizuar dhe forca të huaja. Ky pretendim mbetet një akuzë e bërë nga kreu i qeverisë dhe kërkon verifikim nga organet kompetente.

Rama pretendoi gjithashtu se një pjesë e protestave po përdoret për të ushtruar presion ndaj institucioneve dhe për të detyruar qeverinë të ndryshojë kursin e saj politik.

“Kjo protestë, përmes Instagramit dhe TikTok-ut, mbështetet edhe nga të rinj që e shohin dhunën si një mundësi për ta ulur në gjunjë qeverinë, institucionet dhe, në fund fare, për të më imponuar mua një shkelje të kontratës me shqiptarët”, deklaroi ai.

Në vijim, kryeministri përsëriti akuzat për financim të protestuesve nga krimi i organizuar dhe forca të huaja, duke pretenduar se synimi është destabilizimi i vendit.

“Këta persona janë paguar nga krimi i organizuar dhe forca të huaja dhe duan ta kthejnë përmbys Shqipërinë, ndërkohë që Shqipëria me dinjitet është vendosur në arenën ndërkombëtare”, u shpreh Rama.