“Rama po u bën presion deputetëve të vet”- Berisha para Kuvendit: Do pengojmë votimin e Territoriales! Ai ka frikë se mos ndokush…

Para hyrjes në Kuvend, kryetari i Partisë Demokratike Sali Berisha akuzoi kryeministrin Edi Rama se po ushtron presion mbi deputetët socialistë për votimin e Reformës Territoriale. Sipas tij, brenda sallës po krijohet një klimë terrori ndaj ligjvënësve të mazhorancës.

Shefi i opozitës tha se kreu i qeverisë i ka marrë me libër shtëpie deputetët e tij. Arsyeja, sipas tij, është frika se ata nuk do ta votojnë reformën. Këtë qasje e cilësoi si të shëmtuar dhe të turpshme.

Berisha u shpreh: "Edi Rama po i kap me libër shtëpie deputetët e tij nga frika se nuk do të votojnë reformën. Ky është një akt i shëmtuar, një akt i turpshëm". Ai theksoi se deputetët duhet të ndjehen përgjegjës para aktit që u propozohet të kryejnë.

Më tej ai deklaroi: "Megjithatë, ai ka bllokuar sallën e parlamentit dhe është duke bërtitur si i çmendur deputetëve të vet. Po ushtron terror në Kuvend, po i bën presion "ti ke marrë këtë favor", "ti ke marrë këtë koncesion...""

Për protestën e paralajmëruar, kreu demokrat tha se thirrja u është drejtuar demokratëve, por tubimi i përket qytetarëve. Ai u shpreh: "Ne i kemi thirrur demokratët, por protesta është e qytetarëve. Ka protestues nga gjithë Shqipëria, të të gjitha partive, pa simbole partiake. Do jetë protestë e njerëzve që shohin se interesat e tyre po shkelmohen në mënyrë kriminale".

Berisha paralajmëroi se opozita do të pengojë votimin e Reformës Territoriale në Kuvend. Sipas tij, kryeministri ka frikë se ndonjë deputet i mazhorancës mund të mos rreshtohet me votën pro.