Rama mbledh sot ministrat dhe drejtuesit politikë, në fokus “Besa” dhe bashkëqeverisja

Kryeministri Edi Rama zhvillon këtë të premte një takim me anëtarët e kabinetit qeveritar dhe drejtuesit politikë të Partisë Socialiste në qarqe. Mbledhja është planifikuar për orën 17:30 në selinë e PS-së dhe vjen pas takimeve dyditore në Pogradec dhe mbledhjes së qeverisë një ditë më parë.

Bashkëqeverisja dhe organizimi i strukturave socialiste në territor do të jenë në qendër të diskutimeve. Rama do t'u ofrojë drejtuesve politikë udhëzime për fillimin e takimeve në zonat e tyre elektorale, duke synuar prezantimin dhe sqarimin e dokumenteve strategjike të mazhorancës, përfshirë "Besën" dhe "Praninë Besnike".

Një temë tjetër që pritet të trajtohet është platforma "Pasqyrë Albania", e prezantuar gjatë qëndrimit në Pogradec. Ajo synon të grumbullojë dhe të ndjekë ankesat e qytetarëve, me qëllim që problemet të marrin përgjigje brenda dy javëve dhe qytetarët të kenë mundësi të monitorojnë në kohë reale ecurinë e kërkesave të tyre.

Sistemi parashikohet të funksionojë përmes dy instrumenteve. "Flamingo Albania" do të shërbejë për mbledhjen e ankesave dhe shqetësimeve të qytetarëve, ndërsa "Radar" do të gjurmojë mënyrën se si kërkesat trajtohen nga ministritë, bashkitë dhe institucionet e tjera.

Përveç organizimit të brendshëm dhe punës për bashkëqeverisjen, Partia Socialiste ka nisur përgatitjet për zgjedhjet lokale të vitit 2027. Në axhendën politike të socialistëve është edhe Asambleja e Partisë Socialiste, e cila pritet të mbahet në javën e parë të shtatorit.