Rama i kthehet Sandro Gozit pas akuzës për fyerje: Aludim i paturpshëm, kjo tregon se çfarë demokratësh jeni…

Përplasja mes kryeministrit Edi Rama dhe politikanëve evropianë vijon të shkaktojë debate të ashpra në rrjetet sociale. Kësaj radhe, Kreu i qeverisë shqiptare i është përgjigjur sekretarit të përgjithshëm të Partisë Demokratike Evropiane, Sandro Gozi, duke e akuzuar atë për një "aludim të paturpshëm".

Debati u ndez pasi Gozi reagoi ndaj kufizimit të disa llogarive të opozitës dhe aktivistëve në platformat sociale në Shqipëri. Përmes një postimi në "X", Rama hodhi poshtë pretendimet e tij. Ai theksoi se shmangia e demokratëve evropianë nga trajtimi i aludimit vizual tregon qartë natyrën e tyre politike.

"Aludimi juaj i paturpshëm vizual dhe refuzimi për ta trajtuar atë tregojnë saktësisht se çfarë lloj demokratësh jeni. Kjo është një pikë e ulët tjetër. Më vjen keq!", shkroi Rama në postimin e tij.

Kjo vjen pasi vetë Gozi kishte mohuar se partia e tij kishte akuzuar qeverinë shqiptare për pezullimin e llogarive. Ai deklaroi se shqetësimi i tyre lidhej vetëm me kufizimin e këtyre llogarive dhe kërkuan transparencë nga ana e Metasë, si dhe shqyrtim nga Komisioni Evropian.

"Kryeministër Edi Rama, fyerjet nuk u japin përgjigje pyetjeve", kishte theksuar më herët Gozi në reagimin e tij. Sekretari i Përgjithshëm i EDP-së shtoi se kërkimi i sqarimeve nuk mund të konsiderohet "agjitacion". Ai ripohoi mbështetjen e demokratëve evropianë për pluralizmin politik dhe lirinë e shprehjes në Shqipëri.

Nga ana e tij, Rama ka mohuar kategorikisht çdo përfshirje të qeverisë. Ai deklaroi se institucionet shqiptare nuk kanë as lidhje dhe as kapacitet teknik për të ndërhyrë në platformat sociale. Më herët, kryeministri akuzoi kritikët për përhapje propagande dhe ngriti dyshime se situata mund të jetë e lidhur me të njëjtat "burime dashakeqe" sipas tij, që nxitën edhe të ashtuquajturin "Revolucion Flamingo".

Kjo përplasje në distancë midis Ramës dhe demokratëve evropianë vijon. Ata mbajnë qëndrime të kundërta sa i takon përgjegjësisë për kufizimet në rrjetet sociale dhe shkaqet e vërteta pas tyre.