Rama: Buxheti 2027 historik, do prekë tavanin e 10 miliardë eurove! Rishpërndarje më tepër nga…

Kryeministri Edi Rama ka ndarë sot, më 7 tetor, pamje nga një takim me ministra dhe funksionarë të lartë të Partisë Socialiste. Bëhet fjalë për një mbledhje të zhvilluar në kuadër të nismës Prania Besnike.

Gjatë këtij takimi u diskutua edhe buxheti i vitit 2027. Sipas kreut të qeverisë, dokumenti financiar pritet të prekë tavanin rekord prej 10 miliardë eurosh.

Ky nivel i ri do të mundësojë një rishpërndarje më të madhe. Burimi do të jetë rritja e qëndrueshme e ekonomisë.

Në postimin e tij në rrjetet sociale, kryeministri shkroi:

“Mirëmëngjes dhe me punën që vijon me takimet e Pranisë Besnike, ndërkohë që po diskutojmë Buxhetin e vitit 2027, që do të prekë tavanin rekord të 10 miliardë eurove, për të rishpërndarë më shumë nga rritja e qëndrueshme e ekonomisë, ju uroj një ditë të mbarë”.