RAI shkarkon gazetarin që u përplas me Ramën për investigimet mbi Shqipërinë

Televizioni publik italian RAI është përfshirë nga një tronditje e brendshme pas vendimit për të hequr gazetarin Sigfrido Ranucci nga posti i drejtuesit të emisionit investigativ "Report".

Fillimisht u njoftua se prezantimi i ri i programit të njohur në kanalin Rai3 do t'i besohej gazetarëve Giulia Presutti dhe Daniele Piervincenzi, një lajm që u bë publik nga RAI gjatë së premtes. Ky ndryshim ka provokuar pakënaqësi të madhe në mesin e redaksisë së "Report", ku gazetarët veteranë të emisionit kanë kërcënuar me një largim kolektiv.

Sipas shpjegimit zyrtar të RAI-s, dy gazetarët e rinj janë zgjedhur për të nisur një kapitull të ri të programit dhe për të përforcuar angazhimin e televizionit publik në fushën e gazetarisë investigative. Të dy kandidatët dolën fitues nga një konkurs i posaçëm për gazetarë profesionistë të institucionit.

Giulia Presutti ka një karrierë të gjatë brenda vetë "Report"-it dhe njihet për përvojën e saj të thellë në gazetarinë hulumtuese. Ndërkaq, Daniele Piervincenzi ka ushtruar detyra si reporter dhe prezantues në disa programe të RAI-t, duke përfshirë "Nemo – Nessuno escluso" dhe "Popolo Sovrano". Emri i tij u bë më i njohur publikisht në vitin 2017, kur u sulmua gjatë një reportazhi në zonën e Ostias.

Ranucci vetë ka komentuar shkarkimin si një "zgjedhje mediokre", duke shprehur frikën se një veprim i tillë mund ta çojë në fund emisionin "Report" ashtu siç publiku e ka njohur gjatë dekadave.

Emri i Sigfrido Ranucci-t dhe i formatit "Report" janë të njohur edhe për shikuesit shqiptarë, kryesisht për shkak të disa investigimeve të thelluara që emisioni i Rai3 ka realizuar mbi Shqipërinë dhe mbi qeverinë e kryeministrit Edi Rama.

Më përplasja e madhe publike ndodhi në vitin 2024, kur "Report" transmetoi dokumentarin "Shqipëria", të përgatitur nga gazetari Giorgio Mottola. Hulmtimi përqendrohej në marrëveshjen ndërqeveritare mes Italisë dhe Shqipërisë për ndërtimin e qendrave të pritjes dhe përpunimit të kërkesave për azil të emigrantëve të shpëtuar në det nga autoritetet italiane. Programi ngriti pyetje të forta rreth konditave të marrëveshjes, kostove financiare dhe kontekstit politik dhe institucional në Shqipëri.

Një pjesë e konsiderueshme e materialit u fokusua në figurën e kryeministrit Rama, në lidhjet e tij me establishmentin politik italian dhe në pretendime të lidhura me ndikimin e krimit të organizuar në jetën publike shqiptare. Pikërisht kjo përbërje shkaktoi një reagim të ashpër nga Tirana zyrtare, me akuzat se emisioni kishte dhënë një pamje të shtrembëruar të realitetit shqiptar dhe hedhje akuza të pabaza.

Situata u tensionua edhe më tej kur kryeministri Rama kontaktoi drejtpërdrejt drejtorin e Rai3, Paolo Corsini, për të shprehur pakënaqësinë e tij. Ranucci iu përgjigj kësaj në publik, duke e cilësuar të pazakontë dhe shqetësuese ndërhyrjen e një kryeministri të huaj tek drejtuesit e medias publike pas një investigimi gazetaresk.

"Report" iu rikthye më pas vetë temës, duke transmetuar edhe reagimin e kryeministrit Rama, dhe debati u shndërrua në një diskutim mbi marrëdhënien midis pushtetit politik dhe autonomisë editoriale të servizit publik italian.

Një tjetër përplasje u shënua në vitin 2025, kur i njëjti emision solli në vëmendje një investigim të ri mbi Shqipërinë. Ky reportazh u fokusua në sektorin e turizmit, flukset investuese, ndërtimet në bregdet dhe ritmet e zhvillimit ekonomik të vendit. Edhe ky material nxiti reagime të forta nga Tirana, me akuza të reja drejtuar "Report"-it për paraqitjen e një realiteti jo të plotë dhe të njëanshëm të Shqipërisë.