Putin dhe “strategjia e vuajtjes”, raporti i NYT: Po kërkon që ta lerë Kievin pa ujë dhe të nxisë pakënaqësi!

Me afrimin e dimrit, Vladimir Putin po ndryshon strategjinë ndaj Ukrainës. Objektivi i ri është rrjeti i ujësjellësit në Kiev. Presidenti rus synon ta lerë kryeqytetin ukrainas pa ujë të pijshëm.

Sipas një dokumenti rus që ukrainasit kanë arritur ta shohin dhe që është siguruar nga The New York Times, planet e Moskës parashikojnë që Kievi të kapitullojë edhe përmes rubinetave të ujit. Arsenali i përshkruar në të numëron 70 raketa balistike, 720 dronë me rreze të gjatë veprimi dhe 150 bomba të drejtuara.

Ky arsenal, sipas dokumentit, do të mjaftonte për t’i privuar tri qytete — Kievin, Harkivin dhe Odesën — nga uji, energjia elektrike dhe ngrohja. Plani, të cilin ukrainasit ia kanë prezantuar partnerëve në Europë, parashikon shkatërrimin e 90 për qind të aftësisë prodhuese për energji elektrike dhe për furnizim me ngrohje në këto tri qytete.

Bëhet fjalë për vlerësimin e vetë sulmuesve, jo për një rezultat të sigurt. Por ai konfirmon një strategji të qartë: të arrihet përmes vuajtjeve të civilëve ajo që ushtria ruse nuk arrin ta sigurojë në fushën e betejës.

Për ta lerë Kievin pa ujë nuk duhet tharë lumi Dnipro. Mjafton të ndalen pompat që e marrin ujin, e shpërndajnë drejt banesave dhe largojnë ujërat e zeza. Rrjeti i ujësjellësit transporton rreth 700 milionë litra ujë në ditë. Në kryeqytet ai hyn mes konsumatorëve më të mëdhenj të rrymës elektrike.

Çdo central i goditur dhe çdo nënstacion i dëmtuar mund ta ndërpresë këtë qarkullim jetik. Ndërkohë, çdo avari e re vjen mbi të vjetrat, ndërsa ekipet përpiqen të riparojnë një rrjet që mbetet i pambrojtur nga bombardimet.