“Publikimi i videove intime i qëllimshëm”, avokatja: Sa vite rrezikojnë përgjegjësit?

Rasti i videove intime të shpërndara gjerësisht në rrjetet sociale u diskutua këtë të enjte, më 1 tetor, në emisionin “Rudina”. Paneli i të ftuarve e vuri theksin te kjo çështje. Ajo ka nxitur spekulime të shumta mbi arsyet e publikimit.

Avokatja Margarita Kola vlerësoi se materialet nuk paraqesin asnjë interes për publikun. Sipas saj, publikimi është bërë me dashakeqësi dhe me qëllim të qartë. Është një akt i paramenduar, theksoi ajo.

“Ajo që më shqetëson mua është kush ka interes për jetën e të tjerëve? Pranohet të thuhen lajme që trondisin opinionin, po atëherë kur opinioni ka interes për lajme të tilla, sepse gjithë shoqëria është e interesuar dhe afektohet. Ka një mision dashakeqës. Pse ka dalë tani? Dikush duhet të mbajë përgjegjësi, sepse janë bërë me qëllim.”

Sa i përket ndëshkimeve për përgjegjësit, avokatja sqaroi se bëhet fjalë për vepra penale relativisht të reja. Ato janë marrë nga legjislacione të huaja. Marzhet e dënimit nuk janë të larta.

“Marzhet e dënimit për vepra të tilla, për hir të së vërtetës, nuk janë të larta siç i konsiderojmë ne. Shkojnë nga 2-3 vjet, por varet nëse personi që ka kryer veprën penale ka kryer edhe të tjera, atëherë do t’i mblidhen dënimet nëse veprat penale nuk konkurrojnë.”

Në mungesë të një denoncimi, hetimi mund të vijojë vetëm për shpërndarësin e videove. Kjo u nënvizua nga avokatja. Ndërsa veprat e tjera penale hetohen ndryshe. Ato ecin përpara vetëm nëse palët e përfshira në video marrin vetë nismën.