PS ndryshon vendin e takimit të Ramës me drejtuesit politikë dhe ministrat, ja ku do mbahet! Protestuesit bënë thirrje për grumbullim para selisë

Mbledhja e paralajmëruar nga kryeministri Edi Rama me strukturat drejtuese dhe ministrat e Partisë Socialiste ka ndryshuar vendndodhjen. Në vend të selisë së partisë, takimi do të mbahet në Pallatin e Brigadave.

Vendimi u mor për arsye të masave të sigurisë. Më herët ishte njoftuar se mbledhja do të zhvillohej në godinën rozë në orën 17:30, por kjo u anulua.

Ky ndryshim vjen pasi një ditë më parë, gjatë protestës së opozitës, njëri nga pjesëmarrësit bëri thirrje publikisht për mbledhjen e qytetarëve përpara selisë socialiste sot.

Po në atë tubim u apelua përdorimi i vezëve si mjet proteste ndaj drejtuesve socialistë. Kjo skenë ripërsërit atë që ndodhi në fund të korrikut, kur protestuesit hodhën vezë drejt Parlamentit.