Protesta në Patos-Marinzë, banorët kërkojnë zbatimin e kontratave nga “Bankers” dhe paralajmërojnë bllokimin e tokave

Banorët e zonës Patos-Marinzë kanë zhvilluar sërish sot protesta, duke insistuar që kompania "Bankers" të zbatojë plotësisht marrëveshjet e qirasë së tokave, të cilat sipas tyre vlejnë deri në vitin 2029.

Për sipas tyre, kontratat aktuale parashikojnë një pagesë vjetore prej 4 milionë lekësh për çdo dynym toke. Megjithatë, ata akuzojnë kompaninë se nuk i përmbush detyrimet ligjore nga këto marrëveshje.

Përveç zbatimit të plotë të marrëveshjes deri në 2029, tashmë debati është shtrirë edhe në vlerën e pagesave për periudhën pas këtij viti. Banorët kërkojnë që qiraja të rritet në 6 milionë lekë për dynym pas 2029-shit.

Ata theksojnë se, nga ana tjetër, kompania ka propozuar një ulje drastike, në vetëm 2 milionë lekë për dynym pas skadimit të kontratës aktuale.

Situata është tensionuar ndjeshëm mbrëmjen e djeshme. Rreth 20 protestues ngujuan brenda zyrave të kompanisë "Bankers" dhe qëndruan aty deri në orët e para të mëngjesit, konkretisht deri në 04:00.

U larguan nga ambientet vetëm pasi morën premtime se do të hapen bisedime zyrtare për t'i adresuar kërkesat e tyre.

Megjithëse u dha sinjali i dialogut, protestuesit nuk janë tërhequr nga qëndrimi i tyre. Atë i kanë vënë një ultimatum kompanisë.

Nëse nuk mbërrijnë pagesat sipas kontratës, duke filluar nga nesër, ata paralajmërojnë se do të bllokojnë hyrjen e punonjësve të "Bankers"-it në tokat e dhëna me qira.