“Protesta instrument demokratik, por jo dhuna”- Ish-zv/kryeministri i Kosovës: Shqipëria të mos kthehet në ‘poligon’ të ambicieve të huaja, nëse cenohet…

**Ish-zv/kryeministri i Kosovës: Protesta është instrument demokratik, dhuna jo. Shqipëria të mos bëhet “poligon” i ambicieve të huaja**

Haki Abazi, ish-zëvendëskryeministri i Kosovës, kërkoi në Ballkan Update që Shqipëria të reflektojë mbi zhvillimet politike të kësaj periudhe. Sipas tij, nuk duhet lejuar që eskalimi i dhunës të vërë në rrezik sigurinë publike dhe stabilitetin e vendit.

Protestën ai e quajti instrument demokratik. Dhuna, theksoi Abazi, nuk mund të bëhet pjesë e saj. Në kaos, shtoi ai, hapet hapësirë që aktorë të ndryshëm të ndërhyjnë.

Paralajmërimi i tij shkon më tej. Ai sheh interesa që synojnë ta mbajnë Shqipërinë në krizë dhe tranzicion.

“Të gjithë duhet të jemi të realizuar që të realizohet objektivi i të qenurit pjesë e familjes europiane,” tha Abazi. “Shqipëria është anëtare e NATO-s dhe çfarëdo lloj cenimi i sigurisë nuk do të jetë vetëm problem i Shqipërisë.”

Më pas ai ndau qartë kufijtë mes protestës dhe dhunës: “Protesta është instrument demokratik, por jo dhuna. Në këtë nivel kaosi u jepet mundësia të gjithëve për të penetruar në situata të tilla.”

Sipas ish-zëvendëskryeministrit të Kosovës, “jo pak janë ata që e duan Shqipërinë në tranzicion dhe në krizë”. Ai shkoi edhe më tej me një krahasim kohor: “Tani Shqipëria është në fazën e 2007-ës, me idenë që të ngadalësohet dhe të krijohet një tranzicion i ri.”

Arsyet për reflektim, vuri në dukje ai, nuk mungojnë. “Pjekuria jonë politike duhet kuptuar që dialogu politik është faza e fundit e çfarëdo lloj përplasjeje,” u shpreh Abazi.

Në vijim ai preku rrezikun e ndërhyrjeve nga jashtë. “Nuk duhet të lejojmë që territoret shqiptare të jenë poligon i ambicieve të sëmura të vendeve fqinje. Qoftë kjo Antifa apo ndonjë element tjetër i konsoliduar,” theksoi ai.

Fjalën e mbylli me një vlerësim për peshën e proceseve politike: “Proceset politike janë shumë të rëndësishme.”