Protesta, flet piktori dhe pedagogu i njohur Haliti: Jam me studentët, jo me ata me maska që bëjnë dhunë! (VIDEO)

Piktori dhe pedagogu i njohur Helidon Haliti ka folur për protestat që po zhvillohen në vend. I ftuar në emisionin “Intervista e ditës” në Dritare TV, ai i vlerësoi ato si “gjëja më e bukur që i ka ndodhur Shqipërisë”.

Megjithatë, entuziazmi i tij shoqërohet me shqetësim. Sipas tij, në rrugë janë shfaqur sërish persona me maska, një pamje që kujton vitin 1997. Haliti tha se protesta vetë nuk përbën problem. Ajo që e shqetëson janë “të njohurit e panjohur”.

“Më shqetësojnë ata që në 97-ën i thoshin ‘ata me maska’. Maskat u kthyen prapë në rrugë, në një mënyrë ose në një tjetër. Në Europë nuk e lënë të trashet zullumi”, deklaroi Haliti.

Ai e krahasoi situatën aktuale me një ndeshje pa fitues. “Kur luan Shqipëria kundër Shqipërisë, je në dilemë, nuk di çfarë të bësh. Këtu nuk ka fitimtarë, ka vetëm të humbur”, u shpreh ai.

Në cilësinë e pedagogut, Haliti tha se mbështet plotësisht studentët. Ai theksoi se është “100%” me ta, por kundërshton çdo formë dhune. “Studentët tanë janë vërtetë shumë të edukuar. Në momentin që ngrihen, duhet të ulesh dhe t’i dëgjosh”, tha ai.

Haliti shtoi se studentët e tij i nxjerr për peizazh, jo për protestë.

Piktori u ndal edhe te plagët e së kaluarës që ende nuk janë mbyllur. “Shumë njerëz janë dënuar për krimet e 97-ës, ndërkohë që asnjë politikan nuk është dënuar. Këtu është plaga e hapur”, deklaroi ai.

Në mbyllje, ai u bëri thirrje studentëve të tregojnë kujdes për pronën. “Studentët i dinë vetë hallet e veta, por duhet të mbrojnë pronën private, sepse për atë luftuam ne”, tha Haliti.