Protesta, 16-vjeçari heq maskën dhe flet për dorëheqjen e Ramës: Rrezikoj jetën për t’u rrahur nga policët, shokët janë arrestuar!

Një protestues i mitur hoqi maskën sot gjatë tubimit para Ministrisë së Arsimit dhe foli për dhunën e policisë.

Bëhet fjalë për një gjimnazist 16-vjeçar. Ai tha se nuk është kriminel, as shokët e tij, dhe kërkoi dorëheqjen e kryeministrit Edi Rama.

“Më mbushen sytë me lot, kur kujtoj jo vetëm unë, por të gjithë ata që janë rrahur dhe janë arrestuar, kanë nëna në shtëpi që i presin. Unë nuk jam kriminel, as këta që janë rrahur”, u shpreh ai.

Sipas tij, ata janë thjesht të rinj që kërkojnë të drejtat e tyre. Qëllimi është një e ardhme më e mirë për vendin.

“Na lejoni të protestojmë, hiqeni Ramën, ju lutem. Mundohuni, hiqni kapelen, do të bashkohen me ju. Unë jam gjimnazist, po kërkoj për të ardhmen time, dua një të ardhme sa më të mirë”, tha i mituri.

Gjimnazisti tha se në moshën 16 vjeç rrezikon çdo ditë të dhunohet nga efektivët apo të ndalohet, vetëm pse del në protestë për largimin e Ramës.

“Nuk dua të jem më në këtë vend, nuk dua të ikë më njeri nga ky vend për fajin e Edi Ramës. Nuk kanë faj të rinjtë që largohen nga Shqipëria”, theksoi ai.

Ai shtoi se protestat do të vazhdojnë me të njëjtin ritëm. “Do të vazhdojmë me të njëjtin ritëm proteste, nuk duam të na rrahin, ne nuk jemi të tillë që të mos tregohemi agresivë. Kemi bërë 5 muaj protestë paqësore, nuk i mjaftonte, nuk jep njeri dorëheqjen”, deklaroi 16-vjeçari.

Ai theksoi se vetë nuk është dhunuar, por shokët e tij po. “Janë dhunuar shokët e mi, janë arrestuar. Janë mbajtur më shumë se ç’duhet në rajon, janë pyetur më shumë se ç’duhet, janë thjesht minorenë”, tha ai.

Në fund, gjimnazisti tregoi se prindërit në fillim nuk ishin dakord që ai të dilte në protestë. “Prindërit nuk ishin dakord për të dalë në protestë, por i binda që dua të dal për të ardhmen time”, tha gjimnazisti.