Prostitucioni në kohë moderne: Reklamë online e punë në apartamente me qira ditore në Tiranë

Policia e Tiranës bëri të ditur të premten se ka çuar në fund fazën e dytë të nji operacioni me emrin kodik "Last Post". Ky operacion goditi tri raste të reja të ushtrimit të prostitucionit në kryeqytet, të cilat u kryen në apartamente me qira afatshkurtër.

Në pranga u vendosën katër shtetas: një shqiptar, 35 vjeç, dhe tri gra të huaja, me origjinë nga Vietnami dhe Brazili. Sipas informacioneve, aktiviteti i paligjshëm promovohej në internet, kurse shërbimet ofroheshin në banesa të ndryshme ditore, të shpërndara nëpër lagjet e kryeqytetit. Një person i pestë u procedua me gjendje të lirë, pasi dyshohet si përfitues nga kjo skemë.

Në njoftimin zyrtar, blutë e Tiranës sqarojnë se operacioni u realizua pas një pune të gjatë hetimore dhe operative. Specialistët e Seksionit për Hetimin e Trafiqeve mbikëqyrën aktivitetin në terren dhe në rrjetet sociale. Qëllimi ishte identifikimi dhe goditja e reklamimit të prostitucionit në apartamente me qira ditore.

Konkretisht, u arrestuan shtetasit braziliane I. L., 25 vjeçe, dhe vietnameze U. L., 42 vjeçe, sepse dyshohet se kishin përshtatur dy apartamente në rrugët "Xhoxhi Martini" dhe "Milan Shuflaj" për këtë qëllim. Gjithashtu u ndalua shtetasi shqiptar E. H., 35 vjeç, si dhe vietnameze Th. H., 37 vjeçe. Hetuesit thonë se 35-vjeçari shfrytëzonte gruan për të ushtruar prostitucion në një banesë ditore në rrugën "Him Kolli".

Kjo është faza e dytë e operacionit "Last Post". Më herët, më 4 shtator, autoritetet kryeqytetase kishin arrestuar tre gra të huaja për të njëjtin aktivitet kriminal, që ushtrohej me të njëjtin metodë.