Propozimi i ri i Komisionit Europian, që favorizon Shqipërinë: Anëtarët e rinj të BE me të drejta të plota, por me një përjashtim!

Propozimi i ri i Brukselit për zgjerimin: Anëtarë të rinj me të drejta të plota, por pa veto për anëtarësimet e reja

Komisioni Europian pritet të publikojë të martën dokumentin e ri mbi Politikën e Zgjerimit. Dokumenti parashikon që vendet kandidate të gëzojnë të drejta të plota sapo të bëhen pjesë e Bashkimit Europian. Megjithatë, propozimi mban një përjashtim të vetëm.

Sipas raportimit të A2 CNN, Komisioni do të kërkojë që anëtarët e rinj të mos përdorin veton në dosjet e zgjerimit. Kjo vlen sidomos në rastet kur ka mosmarrëveshje dypalëshe.

Në praktikë, kjo do të thotë se Shqipëria, nëse anëtarësohet, do të trajtohet njësoj si shtetet aktuale anëtare. Përjashtimi i vetëm lidhet me Këshillin e BE-së. Aty Tirana nuk do të mund të bllokojë me veto pranimin e një shteti tjetër kandidat.

Burime zyrtare në Komision theksojnë se integrimi gradual nuk konsiderohet zëvendësim i anëtarësimit të plotë. Ideja e artikuluar më herët nga Rama dhe Vuçiç për qasje në tregun e brendshëm dhe në zonën Shengen pa qenë anëtarë nuk shihet si alternativë. Brukseli megjithatë mbështet dhënien e përfitimeve shtesë, por vetëm mbi bazën e progresit në reforma.

Qasja do të jetë e rreptë edhe për sigurinë ekonomike dhe infrastrukturën kritike. Brukseli synon të frenojë investimet nga vende të treta në sektorë strategjikë, si mbrojtja dhe rrjeti i telekomunikacionit 5G. Qëllimi është të parandalohen investime që, pas anëtarësimit, mund të cenojnë interesat e Bashkimit Europian.

Për më tepër, përafrimi i legjislacionit shqiptar me atë europian nuk do të konsiderohet i mjaftueshëm në vetvete. Brukseli do ta monitorojë drejtpërdrejt zbatimin. Sipas burimeve, miratimi i një ligji në Parlament apo nga qeveria nuk mjafton. Ligjet duhet të zbatohen realisht dhe të respektohen në praktikë.

Në fund të nëntorit pritet vizita e Presidentes së Komisionit Europian, Ursula von der Leyen, në Tiranë. Pas saj, në kryeqytet pritet të mbërrijë edhe komisionerja për Zgjerimin, Marta Kos.