Probleme me shërbimet e Microsoft në mbarë botën, përfshirë Outlook. Miliona njerëz pa akses në email

**Defekt masiv i shërbimeve të Microsoft, Outlook pa akses në mbarë botën**

Përdorues në të gjithë botën po raportojnë probleme me shërbimet e Microsoft, mes tyre edhe Outlook, sistemi i njohur i email-it. Konfirmimin e dha vetë kompania në profilet e saj në rrjetet sociale, pas valës së ankesave për ndërprerje të shërbimit.

“Ndërsa punojmë për të zbutur ndikimin, mund të konfirmojmë se ky problem mund të ndikojë në lidhjen me shërbimet e Microsoft 365 për përdoruesit në çdo zonë gjeografike”, thuhet në njoftimin e kompanisë. “Po hetojmë raportet e përdoruesve që kanë probleme me aksesin në kutitë e tyre postare të Exchange Online duke përdorur metoda të ndryshme lidhjeje në Amerikë”, vijon ai. Sipas Microsoft, një pjesë e infrastrukturës po punon nën ngarkesë të lartë në disa rajone, çka mund të shkaktojë gabime lidhjeje.

Hetimi vazhdon, por ndërkohë përdoruesit nuk mund të dërgojnë as të marrin email-e. Edhe aksesi në kutitë postare është i bllokuar. Raportimet shtohen minutë pas minute.

Problemi nuk kufizohet te Outlook. Të gjitha aplikacionet e Microsoft 365, si Teams dhe Copilot, po shfaqin keqfunksionime. Mjetet profesionale që lidhen me to janë aktualisht jashtë disponimit.