Presidenti Duka me arbitrat e Kategorisë së Parë: Përgjegjësi, profesionalizëm dhe standard i njëjtë në çdo ndeshje -

Presidenti i Federatës Shqiptare të Futbollit, Armand Duka, u takua sot me arbitrat dhe ndihmësit e tyre të Kategorisë së Parë. Qëllimi i takimit ishte përgatitja për sezonin e ri dhe dërgimi i një mesazhi të qartë për profesionalizmin, standardet dhe përgjegjësinë në fushën e arbitrimit.

Në këtë mbledhje morën pjesë edhe drejtori i Departamentit të Arbitrimit në FSHF, Bernardino González Vázquez, si dhe kryetari i Bashkimit të Arbitrave Shqiptarë të Futbollit, Tahir Kastrati.

Duka nënvizoi rolin themelor të arbitrit në zhvillimin e një ndeshjeje. Ai theksoi se trupa e arbitrimit mbart një përgjegjësi të madhe për garantimin e mbarëvajtjes së lojës dhe respektimit të rregullave.

“Unë nuk marr përsipër të bëj leksione teknike se si arbitrohet, por të paktën një gjë e di dhe duhet ta dinë dhe të bindemi të gjithë, ai që komandon lojën është arbitri në fushë. Përgjegjësinë për çdo gabim që ndodh e ka arbitri në fushë. Të gjithë të tjerët janë aksesorë për ta ndihmuar arbitrin kryesor.”

Kreu i FSHF-ë theksoi se nuk ka rëndësi në cilën kategori arbitrohet. Sipas tij, çdo ndeshje është një përballje, garë dhe edukim, prandaj maksimumi duhet dhënë gjithmonë.

“Nuk ka lidhje se në cilën kategori arbitroni, ndeshja është ndeshje, është përballje, është garë, është edukim, si në kategorinë superiore, si në nivelin amator, ti duhet të bësh maksimumin”, – tha ai.

Presidenti foli edhe për rëndësinë e njohjes dhe zbatimit korrekt të rregullave të reja. Ai kërkoi që e gjithë trupa të funksionojë si një skuadër e vetme në bashkëpunim me strukturat drejtuese.

“Duke qenë në këtë fillim kampionati, doja t’ju rikujtoja rregullat e reja që janë futur. Nuk mund t’i nënvlerësoni ata. Një rregull i parespektuar, është më i keq se sa një rregull i pa vënë. Është shumë e rëndësishme që të respektohen dhe të mësohen nga të gjithë.”

Ai shtoi se suksesi varet nga dëshira dhe mbështetja reciproke. sipas tij, arbitrat dhe gjithë trupa duhet të jenë një skuadër e bashkuar.

“Sukseset e Benardinos varen gjithmonë nga dëshira dhe mbështetja. Në radhë të parë e Komitetit të Arbitrimit, në radhë të dytë nga juve arbitrat, e gjithë trupa e arbitrimit në futbollin shqiptar. Në fund të fundit edhe kjo është një skuadër, njësoj si skuadrat e futbollit, nëse nuk funksionon si një skuadër, suksesi është shumë i vështirë për t’u arritur, pothuajse i pamundur”, – u shpreh Presidenti Duka.

Duka paralajmëroi se standardet dhe përgjegjësia do të jenë të njëjta për të gjitha kategoritë. Ai tha se shkeljet disiplinore do të trajtohen sipas rregulloreve, duke përjashtuar dënimet publike për çështje teknike.

“Dënime publike nuk do të ketë për arsye teknike, përveç atyre disiplinore siç e parashikon rregullorja, por ama pezullime afatgjatë apo përgjithmonë padyshim do të ketë, sepse ai që e bën nuk ka pse ta vuajnë të gjithë.”

Në mbyllje, presidenti shprehu dëshirën për një edicion të mbarë. Ai uroi që të ketë lojëra të bukura, spektakël dhe sa më pak gabime.

“Uroj që të kemi një edicion sa më të mbarë. Një edicion me lojëra të bukura, me spektakël, me sa më pak apo hiç gabime”, – tha ndër të tjera në fjalën e tij Presidenti i FSHF.