Policia zbardh detajet e helmimit të 6 fëmijëve në një kopsht në Korçë, nën hetim për shpërdorim detyre drejtoresha e institucionit dhe një mjeke

Dy zyrtare në Korçë janë vënë nën hetim penal pas helmimit të gjashtë fëmijëve në një kopsht publik të qytetit. Bëhet fjalë për drejtoreshën e institucionit, 60 vjeçe, dhe një mjeke 57-vjeçare të Spitalit Rajonal.

Sipas Policisë, ndjekja ndaj tyre ka nisur për veprën penale të shpërdorimit të detyrës. Specialistët për Hetimin e Krimeve në Komisariatin e Policisë Korçë i kanë proceduar penalisht në gjendje të lirë.

Mjekja mban inicialet X. dhe punon në pavijonin e Pediatrisë. Ajo dyshohet se nuk ka njoftuar organet ligjzbatuese pavarësisht paraqitjes së rasteve. Drejtoresha mban inicialet K. dhe drejton kopshtin nga vinin fëmijët e helmuar.

Rasti u evidentua mes pasdites së djeshme dhe ditës së sotme. Gjatë kësaj periudhe u paraqitën në spital gjashtë fëmijë nga i njëjti kopsht. Të vegjlit shfaqën simptoma të njëjta gastrointestinale. Mjekja nuk ka bërë njoftimin e detyrueshëm pranë Policisë.

Ndërsa drejtoresha dyshohet se ka neglizhuar detyrimin funksional. Sipas hetuesve, ajo nuk ka kryer kontrollin dhe verifikimin e ushqimit të konsumuar nga fëmijët në kopsht.

Materialet procedurale do t'i kalojnë Prokurorisë pranë Gjykatës së Shkallës së Parë të Juridiksionit të Përgjithshëm Korçë. Prokuroria pritet të kryejë veprimet e mëtejshme.