Policia nuk i lejon të kalojnë, Këlliçi dhe Blushi përplasen me efektivët te Kryeministria dhe i fyejnë: Hiqe dorën, plehrë…!

Rreth orës 12:30, deputetë demokratë kanë nisur marshimin nga selia e PD-së drejt bulevardit Dëshmorët e Kombit. Ata mbështesin studentët që prej 19 ditësh kërkojnë që kryeministri Edi Rama të japë dorëheqjen.

Që në fillim të marshimit, deputetët Belind Këlliçi dhe Tedi Blushi janë përplasur me policinë para Kryeministrisë. Policia u ka kërkuar të qëndrojnë pas, duke thënë se kanë një urdhër, por deputetët nuk e kanë pranuar dhe kanë kërkuar ta shohin atë.

Gjatë debatit, Këlliçi ka thënë: “Hiqe dorën! Plehrë!” Policia ka kërkuar të presin pak, ndërsa Këlliçi ka pyetur: “Për çfarë i pengon njerëzit? Ça problemi ka, pse pengohen njerëzit?” Policia ka përgjigjur se bëhet fjalë për perimetrin e sigurisë. Një qytetar ka pyetur: “Nga kush siguroheni? Nga kush keni frikë?” Këlliçi ka shtuar se dëshiron të kalojë bashkë me një person që është në biçikletë, në rrugën e tij.