Po trafikonte 11 klandestinë nga Pakistani dhe Bangladeshi drejt vendeve të BE, arrestohet 27-vjeçarit në Korçë, në kërkim 2 të tjerë

Një operacion i koduar “Borders” ka çuar në arrestimin e një 27-vjeçari në Korçë, teksa po transportonte 11 shtetas të huaj nga Pakistani dhe Bangladeshi drejt Malit të Zi. Policia ka shpallur menjëherë në kërkim edhe dy persona të tjerë të dyshuar si bashkëpunëtorë të tij.

Shtetasi J.S., 27 vjeçar me banim në Tepelenë, u kap në fshatin Drenovë në flagrancë. Ai po udhëtonte me automjet drejt Shkodrës, shoqëruar nga 11 emigrantë që kishin hyrë ilegalisht në vend nëpërmjet kufirit të Kapshticës. Mes udhëtarëve ishin 10 shtetas bangladezianë dhe një Pakistani.

Gjatë ndërhyrjes, policia sekuestroi automjetin e përdorur për transport si dhe një celular. Hetuesit thonë se grupi synonte kalimin e kufirit shqiptar drejt Malit të Zi, për të vazhduar më tej drejt vendeve të Bashkimit Evropian.

Përveç të arrestuarit, në kërkim janë shpallur dy shtetas të tjerë: F.S., 31 vjeç nga Fieri dhe G.H., 58 vjeç nga Lushnja. Sipas hetimeve, të tre ata bashkëpunonin për të ndihmuar emigrantët e tretë kundrejt pagesës.

“Vijojnë goditjet e njëpasnjëshme ndaj veprimtarisë kriminale të dhënies ndihmë emigrantëve nga Vendet e Treta, kundrejt fitimit, për kalim të paligjshëm të kufirit”, njoftoi zyrtarisht Policia e Shtetit në deklaratën e saj.

Operacioni u finalizua nga Seksioni i Hetimit dhe ZMPKT i Drejtorisë Vendore të Policisë Korçë, në bazë të informacioneve të siguruara në rrugë operative. Materialet e plota të hetimit i janë dërguar tashmë Prokurorisë së Korçës për veprën penale “Ndihma për kalim të paligjshëm të kufijve”. Autoritetet vazhdojnë punën për kapjen e dy të shpallurve në kërkim.