“Po përdor postin për shantazh“- Berisha merr në mbrojtje gazetaren Lala, dënon deklaratën e Hysenit: Më vonë mund të shantazhojë edhe prokurorët

Kryetari i Partisë Demokratike, Sali Berisha, ka lëshuar akuza të ashpra ndaj ish-kreut të Shërbimit Informativ Shtetëror, Vlora Hyseni. Deklaratat u bënë gjatë një bashkëbisedimi me përfaqësues të medias.

Në fokus të reagimit ishte sulmi verbal që Hyseni i drejtoi gazetares Klodiana Lala. Shkak u bë pyetja e reporterës nëse ish-drejtuesja kishte nxjerrë sekrete shtetërore dhe ia kishte përcjellë elementëve të botës së krimit.

Sipas Berishës, kundërpërgjigjja e ish-shefes së SHISH-it ishte e papranueshme. Ai tha se aludimet e saj për gjoja takime të Lalës me agjentë serbë në kryeqytet nuk janë gjë tjetër veçse shpifje. Kreu i opozitës e cilësoi këtë si një akt hakmarrjeje për investigimet që gazetarja ka publikuar.

Berisha kujtoi edhe pretendimet e mëparshme për përgjimin e gazetarëve nga ana e shërbimit sekret.

“Që SHISH ka pasur në përgjim gazetarë, e kam konstatuar para jush. Por kjo gjë nuk u ka pëlqyer gazetarëve. Kjo është një shefe ordnere. Që t’u përgjigjesh gazetarëve në atë mënyrë, dëshmon se është hakmarrëse e verbër. Shpif për një gazetare që sulmon atë dhe padronin e saj. Në rast se ka pasur takime, se kë takon ti dhe se çfarë është në agjendë, s’ka lidhje me bashkëpunimin. Nëse shërbimi ka pasur një operacion, por tregon se s’ka pasur, është vetëdemaskim. Ajo përdor postin për të bërë një shantazh ndaj gazetarëve, pasi ky është problem i madh. Se do të shantazhojë dhe prokurorë e gjykatës. Është proces në vijim. E akuzon për mbrojtje të kriminelit dhe nxjerrje të sekretit. Akuza se si të lehtësohet, kur ajo ka kryer veprat më të rënda. Pas saj është Edi Rama. Ata gazetarë që kanë takuar Vlora Hysenin, të bëjnë gati dosjen, shoqatat e gazetarëve, që t’i demaskojnë se rrezikojnë të paktën 5 vite burg. Siç ishte Berati, që thoshte: e kam mikeshë. Batoni shkruajti shkrimin se Vlora e kishte dashurinë në funksion të shërbimit. I dëgjoni marrëzitë, që të kanalizohej te historia rozë. Edhe Albatrosi në ato ujëra”, u shpreh Berisha.

Ai paralajmëroi se përdorimi i detyrës për presion ndaj reporterëve përbën rrezik serioz. Sipas tij, e njëjta skemë mund të shtrihet nesër edhe ndaj prokurorëve dhe gjyqtarëve.

Kreu i PD-së shtoi se pas Hysenit qëndron kryeministri Edi Rama. Ai u bëri thirrje shoqatave të gazetarëve të zbardhin rastet e kolegëve që kanë pasur kontakte me ish-drejtuesen e SHISH-it, duke pretenduar se ata rrezikojnë deri në pesë vite heqje lirie.