“Po deputetët e PD a i godisni me vezë si mua?”- Ligjvënësja socialise “kap mat” me pyetje mjekun aktivist: Ju thoni se i keni target edhe ata, por…

Përballje mes Sara Milës dhe Ermal Pashajt në "Off the Record" të A2 CNN

Në emisionin "Off the Record" të A2 CNN u zhvillua një debat mes deputetes socialiste Sara Mila dhe mjekut Ermal Pashaj. Në qendër ishin parimet dhe sjellja e protestuesve. Sipas Milës, ata kërkojnë burg edhe për Sali Berishën, por të enjten protestuan krah tij.

Gjatë diskutimit ajo i drejtoi një pyetje të drejtpërdrejtë aktivistit. Mila tha se vetë goditet me vezë nga protestuesit. Ajo kërkoi të mësojë nëse i njëjti trajtim u rezervohet edhe ligjvënësve demokratë.

"Ju i sulmoni me vezë deputetët e Partisë Demokratike? Pyetje direkte, sepse unë personalisht marr vezë nga protestuesit. Po deputetët e Partisë Demokratike i godisni me vezë? Janë ata targeti juaj? Se ju thatë që nuk kanë ndarje. Tani i bie ose të jenë, ose të mos jenë target. Atëherë, ta dimë", pyeti Mila.

Pashaj u përgjigj pa hezitim. Ai e pranoi se po, por shtoi se thelbi nuk qëndron aty.

"Sigurisht që po. Sigurisht! Por unë nuk mendoj që kjo është një situatë e cila duhet transferuar te cili qëllojmë me vezë apo te cili nuk qëllojmë", iu përgjigj Pashaj.

Më pas diskutimi kaloi te reforma territoriale. Aktivisti kërkoi qartësim për pikat ku Bashkimi Europian rekomandon ndryshimin e kufijve. Ai theksoi se është përpjekur të gjejë referenca.

"Duhet të sqaroni se cilat janë këto pika në të cilat Bashkimi Europian rekomandon ndryshimin e kufijve. Në dijeninë time, jam munduar të lexoj dhe të gjej referenca. Bashkia e Patosit është një bashki që ka pasur një eficiencë jo të keqe, madje më të mirë se Fieri, për sa i përket eficiencës ekonomike. Por unë e shoh atë të bashkohet me Fierin, ndërkohë që një bashki, po të doni ju, edhe më e vogël, si ajo e Roskovecit, nuk përfshihet në këtë reformë. Unë nuk arrij të jap një përgjigje", shtoi ai.

Ai ngriti edhe një argument tjetër. Sipas tij, nuk janë respektuar disa kritere bazë. Popullsia nuk u mor si parim. As sipërfaqja territoriale. As traditat dhe lidhjet mes banorëve.

"E dyta, pra, nuk është marrë si parim numri i popullsisë, nuk është marrë parim madhësia territoriale, nuk është marrë parasysh përqafimi i dokeve zakonore apo situatave të caktuara të ndërlidhjes së qytetarëve në to. Po përzihen dy zona që nuk janë të njëjta, qoftë nga relievi, qoftë nga doket zakonore, qoftë nga fenomene të tjera. Ka disa bashki që janë subjekte të burimeve minerare. Këto burime minerare janë burime nga të cilat, sipas rentës minerare, niveli i së cilës është jashtëzakonisht i ulët, duhet të përfitonin këto bashki".