Plas humori i zi mes deputetëve te Ligjet, Korreshi: Plaka ime s’di të përdorë pultin, jo më e-Albania, s’i punon mrrokulla! Manja: Do e rregullojmë

Debati mbi projektligjin për inteligjencën artificiale shkaktoi një përplasje të ashpër në Komisionin e Ligjeve midis deputetit demokrat Saimir Korreshit dhe kryetarit të komisionit, Ulsi Manja.

Korreshi denoncoi me tone të forta një realitet të ndryshëm nga ai që diskutohej në tryezë. Sipas tij, teksa flitet për digjitalizim dhe teknologji të avancuara, në terren mungojnë thuajse të gjitha kushtet bazë.

Si shembull konkret, deputeti demokrat përmendi familjen e tij. Nëna e tij, tha ai, nuk arrin ende të përdorë pultin e thjeshtë të televizorit. Aq më pak mund të presësh prej saj që të lundrojë në platformën e-Albania.

“Ne po kalojmë te nota A, ndërkohë që jemi me brekë të grisura,” u shpreh Korreshi në komision. “Hyn në njësinë administrative dhe duhet të vësh një ombrellë mbi kompjuter që të mos e kapë shiu. Është një katastrofë. Ju flisni për inteligjencën artificiale, por atje nuk punon asnjë mrrokull.”

Manja, i cili drejtonte mbledhjen, iu përgjigj se pyetjet ishin përfunduar. “Do t’i rregullojmë,” tha ai shkurt. “Ke pyetje të tjera?”

“Sa shpeft u lodhe?” ia ktheu menjëherë Korreshi.

“Jo, nuk u lodha,” përgjigjet Manja.

Deputeti demokrat vazhduoi sulmin, duke sjellë sërish shembullin e nënës së tij. “Hyn deputeti dhe nuk punon asnjë kompjuter. Nuk ndizet. Ajo plaka ime nuk di të punojë pultin e TV, jo më të hyjë te e-Albania,” rrëfeu ai. “Thotë: ‘Lëre te ky kanal dhe mos e luaj.’ Për email-et tona, ju keni ndërruar 17 herë variantin. Unë s’di ta ngas. Ky shtet mban përgjegjësi.”