“Personat me maska do t’i gjejmë përmes teknologjisë”, Rama: Ndalojmë aksesin në vendet e BE të protestuesve të dhunshëm

**“Personat me maska do t’i gjejmë përmes teknologjisë”, Rama: Ndalojmë aksesin në vendet e BE të protestuesve të dhunshëm**

Kryeministri Edi Rama paralajmëroi një paketë të re masash ndaj protestuesve që kanë ushtruar dhunë mbi policët dhe kanë sulmuar institucionet. Njoftimin ai e dha gjatë takimit me drejtuesit e sistemit bankar në Shqipëri. Sipas tij, dokumenti do të dalë shumë shpejt.

Në fjalën e mbajtur atje, kreu i qeverisë theksoi se investimi në teknologji do të shërbejë për të identifikuar ata që fshehin fytyrën. Do të nisë gjithashtu deanonimizimi i profileve që nxisin dhunë, tha ai.

“Që të gjitha të kthehen një orë e më parë, ne do nxjerrim një orë e më parë paketën e masave, duke investuar me shpejtësi në teknologji, ne do fillojmë deanonimizimin e profileve që nxisin dhunë, duke investuar në teknologji, ne do zbulojmë ata që janë me kapuç edhe sikur të mbulojnë të gjithë fytyrën sepse do i ndjekim këmba-këmbës”, u shpreh Rama.

Mesazhi, sipas kryeministrit, nuk është thjesht një qëndrim politik. “Ky nuk është një qëndrim për të folur, por një informacion për të gjithë ata që janë ende me dhunën që të largohen nga ajo rrugë një orë e më parë”, vijoi ai.

Një paralajmërim i veçantë erdhi për familjarët e të miturve të përfshirë në akte dhune gjatë protestave. Ata nuk do të përfitojnë asnjë shpërblim nga shteti. Fatura, theksoi Rama, do të shkojë në familje dhe do të paguhet nga familja.

“Çdokush që ka një fëmijë të mitur duhet të kujdeset për të. Do ju vijë fatura në familje, do paguajë familja. Nuk do marrë më asnjë shërbim nga shteti familja e një të mituri që vjen dhe djeg pronën e tjetrit”, deklaroi ai.

Në vijim, kreu i qeverisë njoftoi krijimin e një regjistri të posaçëm për personat e dhunshëm. Për ta do të bllokohen akseset në aeroporte, hotele, trena dhe në gjithë mjetet e transportit. Paralelisht, Shqipëria ka nisur punën me vendet e Bashkimit Evropian për t’u ndaluar atyre hyrjen në këto shtete.

“Patjetër që ne do vendosim në regjistër të veçantë njerëzit e dhunshëm dhe ju mbyllim shumë aksese në aeroporte, hotele, trena, dhe gjithë mjetet e transportit dhe natyrisht do bashkëpunojmë dhe kemi nisur punën me vendet e BE për t’ua ndaluar aksesin në ato vende njerëzve të dhunshëm. Është shumë e rëndësishme të kuptohet dhunë se s’ka vend në këtë vend”, përfundoi Rama.