Pas Vlorës ndodh edhe në Dibër, humb jetën një tjetër elektricist! 60-vjeçari ndërron jetë në spital, nën hetim përgjegjësi i nënstacionit elektrik

Elektricist 60-vjeçar ndërron jetë në spital pas aksidentit në Dibër

Një 60-vjeçar ka vdekur në spital pasi një shtyllë elektrike e zuri poshtë gjatë montimit të saj në fshatin Vasie të Dibrës.

Ngjarja u regjistrua më 5 nëntor, rreth orës 11:45. Sipas të dhënave paraprake të policisë, shtetasi L. Sh., elektricist, dyshohet se po kryente punime për ngritjen e një shtylle elektrike kur ajo u rrëzua dhe e zuri poshtë.

Si pasojë e lëndimeve, 60-vjeçari ndërroi jetë në spital.

Për këtë rast është proceduar penalisht në gjendje të lirë përgjegjësi i nënstacionit elektrik në Fushë-Alie të Dibrës. Sipas njoftimit të policisë, B. D., 59 vjeç, banues në fshatin Renx, akuzohet për “Shkelja e rregullave të mbrojtjes në punë”.

Hetimet vazhdojnë për dokumentimin e plotë të rrethanave të ngjarjes.