Papa Leo XIV dërgohet në spital

Papa Leo XIV është larguar të martën nga Vatikani me një autokolonë automjetesh, për t’u shtruar në spitalin Gemelli në Romë, ku pritet t’i nënshtrohet një operacioni për heqjen e një formacioni të vogël të zbuluar në njërën prej mushkërive.

Ky është problemi i parë serioz shëndetësor i bërë publik gjatë pontifikatit të tij, i cili ka zgjatur rreth 17 muaj.

Papa 71-vjeçar njoftoi të dielën se gjatë një kontrolli të fundit mjekësor ishte zbuluar një nyjë e vogël në mushkëri. Sipas tij, formacioni është i lokalizuar dhe është zbuluar në një fazë të hershme, shkruan france24.

Shërbimi për shtyp i Vatikanit bëri të ditur se operacioni pritet të kryhet të martën pasdite nga ekipi i kirurgjisë torakale i spitalit Gemelli, nën drejtimin e profesorit Stefano Margaritora.

Sipas Vatikanit, rikuperimi i Papës pritet të zgjasë rreth një javë. Të gjitha paraqitjet dhe aktivitetet e tij publike janë anuluar deri më 20 tetor.

Spitali Gemelli ndodhet rreth nëntë kilometra në veri të Vatikanit, ndërsa udhëtimi deri atje zakonisht zgjat më pak se gjysmë ore.

Operacioni synon heqjen e formacionit, ndërsa analizat mjekësore do të përcaktojnë natyrën e tij dhe nëse do të nevojitet trajtim i mëtejshëm. Zbulimi i hershëm konsiderohet një faktor pozitiv për prognozën. /ABC24.AL/